"VI CERTAME DE RELATO CURTO DE PAZOS DE BORBÉN" - ENTREGA DE PREMIOS CATEGORÍA A: PERSOAS CON DIVERSIDADE FUNCIONAL (1)

O pasado Xoves día 19 de decembro de 2024 a partir das 13:00 horas tivo lugar no Auditorio do Concello a entrega de premios do VI CERTAME DE RELATO CURTO DE PAZOS DE BORBÉN no que participaron 164 persoas, todas elas escolares do CPI "Curros Enríquez" de Pazos e da EEI "A Galeriña" de Nespereira; e usuarios da Asociación ASPAVI.

O acto estivo presidido polo Alcalde-Presidente do Concello D. Xosé Luciano Otero Camiña e nel contouse coa presenza dos concelleiros D. Iván Martínez Ventín e Dª Mª Victoria Couñago Corujeira; ademáis dos membros do xurado Dª Mª Eugenia Porritt Lueiro, D. Manuel González Pastoriza, Dª Andrea Barreira Freije, Dª Mª Isabel Lorenzo Castro, D. Miguel Anxo Alonso Diz e D. José Manuel Soto Virulegio.

A mestra do CPI "Curros Enríquez" e membro do Xurado
Dª Mª Eugenia Porritt Lueiro durante a súa intervención

Iniciouse a gala coa intervención da membro do xurado e mestra do CPI "Curros Enríquez" de Pazos Dª Mª Eugenia Porritt Lueiro que agradeceu aos asistentes a súa presenza no acto e a súa participación no certame, ademáis de felicitalos pola calidade dos debuxos e escritos.

Intevención do escritor e membro do xurado D. Miguel Anxo Alonso Diz

Continuaron os discursos coa intervención do escritor D. Miguel Anxo Alonso Diz que felicitou a todos os participantes polos seus traballos e pola súa participación nesta sexta edición do Certame e á Biblioteca e ao Concello pola iniciativa e implicación para levar a cabo o mesmo.

Intervención do Alcalde de Pazos de Borbén
D. Xosé Luciano Otero Camiña

Finalizaron estas intervencións cunhas palabras do Alcalde de Pazos de Borbén e Presidente do Xurado D. Xosé Luciano Otero Camiña que se dirixiu ao público reunido no auditorio para expresar o seu agradecemento aos asistentes pola súa presenza neste acto e ao persoal da Biblioteca polo traballo realizado para que este certame chegue á sexta edición con tanto éxito de participación. Agradeceu tamén aos membros do xurado o seu traballo manifestando que o pasaron moi ben lendo os relatos e vendo os debuxos e finalizou dándolle a benvida a este acto a todos os presentes e ver un auditorio tan cheo de vitalidade e de alegría na espera coñecer aos premiados deste ano.

O Secretario do Xurado José Manuel Soto Virulegio
iniciando a lectura para a entrega de premios

Unha vez rematados estes pequenos discursos procedeuse polo Secretario do Xurado á lectura da relación de galardoados neste VI Certame de Relato Curto de Pazos de Borbén.

CATEGORÍA A: PERSOAS CON DIVERSIDADE FUNCIONAL

Gañadores e presentados da Categoría A

O PRIMEIRO premio correspondeu ao traballo titulado "A COSTUREIRA" e o pseudónimo de "PEPE", presentado por Mª RITA RIBEIRO DURÁN, de 56 anos, pertencente á Asociación ASPAVI.

Para ler o relato premiado fai CLIC no título.

Mª Rita Ribeiro Durán recibindo o 1º premio que
lle entrega Dª Mª Eugenia Porritt Lueiro

O SEGUNDO premio foi outorgado ao traballo títulado "A NOITE ENCANTADA" e o pseudónimo de "LENDA", presentado por JOSÉ MANUEL BOULLOSA GARCÍA, de 44 anos, pertencente á Asociación ASPAVI.

Para ler o relato premiado fai CLIC no título.

José Manuel Boullosa García co 2º Premio desta categoría

Nesta categoría concedéronse os seguintes accésits:

Traballo presentado baixo o título "A CASA DO CAMPO" e o pseudónimo de "PEREGRINO" de MONCHO FREAZA FARO, de 39 anos, pertencente á Asociación ASPAVI.

Para ver o relato/debuxo premiado fai CLIC no título.

Moncho Freaza Faro recibe o seu premio de mans
do escritor Miguel Anxo Alonso Diz

Traballo presentado baixo o título de "A CASA DO BOSQUE" e o pseudónimo de "COLORIN" de DIEGO FERNANDEZ VILANOVA, de 26 anos, pertencente á Asociación ASPAVI.

Para ver o relato/debuxo premiado fai CLIC no título.

Diego Fernández Vilanova recibe o seu premio
entregado por Dª Mª Eugenia Porritt Lueiro

Unha vez entregados os premios aos galardoados desta categoría chamouse un por un ao resto dos participantes non premiados para entregarlles a cada un deles un Diploma acreditativo da súa participación no certame e un libro de agasallo. E, por último, entregouse tamén un lote de libros para o centro ao que pertencen as persoas presentadas.

A Directora da Asociación ASPAVI Dª Mª Isabel Lorenzo Castro recibe o
lote de libros que lle entrega Dª Mª Eugenia Porritt Lueiro.

Nos próximos días seguiremos publicando os datos e imaxes da entrega de premios dos gañadores e participantes do resto das categorías en novas noticias que sairán publicadas neste Blog e no Facebook da Biblioteca.

Esta actividade enmárcase no programa de actividades de dinamización da Lingua Galega do ano 2024 "OBRADOIROS E CERTAME DE CREACIÓN LITERARIA" que organiza a Biblioteca Pública Municipal e que conta coa axuda e patrocinio do Concello de Pazos de Borbén e da Deputación Provincial de Pontevedra.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

"CONCERTO PUNKINFANTIL" con Peter Punk Pallaso e Brais das Hortas - Circuíto + ESCÉNICAS 2024

E para animar o NADAL finalizamos as actividades do circuíto +ESCÉNICAS de apoio á programación de artes escénicas en galego nos concellos da provincia de Pontevedra que organiza o Servizo de Cultura da Deputación Provincial en colaboración cos concellos co fin de promover o impulso e o fomento da cultura galega nas súas múltiples e variadas expresións, así como a creación e a difusión artística, favorecendo o uso e a convivencia na nosa lingua.

Esta última actividade deste programa é o "CONCERTO PUNKINFANTIL" que nos traerán PETER PUNK PALLASO e BRAIS DAS HORTAS o Sábado 21 de Decembro a partir das 18:00 horas tamén no Auditorio do Concello para todos os públicos.

Punk para nenas? Porque non? Que hai máis punk ca unha nena? O punk é rebeldía, é pensar por tí mesma. Do it Yourself!!

Punk para nenas? Por que non?! E logo? Que hai máis punk ca unha nena?

O punk é rebeldía, é pensar por ti mesma. Do it Yourself!! Faino ti ao teu xeito!! Como poidas, como queiras e como che preste! O punk é ir a contracorrente, non ser coma a maioría porque cada unha de nós é diferente. O punk é berrar, rir, facer pis... e tamén escribir as túas propias cancións, facer a túa banda, atopar a túa personalidade. O punk é protestar. Quen non chora, non mama!! Sabemos o que queremos, sabemos o que non queremos e estamos dispostas a chorar, cagar e patexar!! Se non podemos xogar, non é a nosa revolución!

Un cantante punk e un cantante infantil condenados a compartir escenario acaban creando un delirio musical chamado "Concerto Punklnfantil".

Tras descubrirse e recoñecerse van confluíndo, progresivamente, nun espazo común dando como resultado este espectáculo musical e de clown para todos os públicos, no que está presente o concepto punk máis alá dos aspectos máis superficiais. Vencellado directamente co mundo infantil e as inquedanzas das cativas e cativos.

Esta actividade tamén é con entrada de balde ata completar o aforo do local.

Non vos esquezades, esperámosvos!!!

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

ENTREGA DE PREMIOS DO "VI CERTAME DE RELATO CURTO DE PAZOS DE BORBÉN"

O día 28 do pasado mes de setembro informábamos da convocatoria do "VI CERTAME DE RELATO CURTO DE PAZOS DE BORBÉN" no que podía participar todo o alumnado de Educación Infantil, Primaria e Secundaria residente no municipio que estivera ou estea cursando estudos de nos colexios públicos do municipio durante os cursos 2023/2024 e/ou 2024/2025; e tamén os usuarios dos Centros de Atención a Persoas con Diversidade Funcional con sede e actividade no concello de Pazos de Borbén.

Como xa sabedes de edicións anteriores, coa convocatoria desta 6ª edición do certame o Concello pretende seguir animando á creación literaria, á escrita e á lectura en lingua galega; fomentar a creatividade e potenciar a expresión e a comprensión escritas, estimulando o uso da lingua galega entre os escolares e os mais mozos, así como tamén entre o colectivo de persoas con diversidade funcional.

Igual que no ano 2023 o número de categorías para participar foron sete (7), dúas máis que nas catro primeiras edicións, incluíndo ao alumnado de Infantil e ao colectivo de persoas con diversidade funcional.

O prazo para presentar os traballos estableceuse entre os días 1 de outubro e o 15 de Novembro de 2024; e, finalmente, presentáronse un total de 164; un novo récord en todos os anos de existencia deste pequeno certame literario; foron 15 máis que os presentados o ano pasado, e 106 mais que na edición do ano 2022.

Os participantes podían presentar un único debuxo ou relato que tiña que ser orixinal, inédito, escrito en lingua galega e non premiado dentro do prazo estipulado nas bases do certame e entregalo na Biblioteca.

Na Categoría A: Persoas con Diversidade Funcional presentáronse 16 participantes, todos eles pertencentes á Asociación ASPAVI, que entregaron cadanseu debuxo ou relato.

Os participantes da Categoría B: Alumnado de Educación Infantil presentaron un debuxo cada un, e así o fixeron 42 alumnos e alumnas de Infantil do CPI “Curros Enríquez” de Pazos e da EEI “A Galeriña” de Nespereira.

Na Categoría C: 1º e 2º de Primaria, foron 26 rapazas e rapaces do CPI “Curros Enríquez” de Pazos os que participaron cun debuxo cada un con algunha frase alusiva aos debuxos presentados.

O alumnado de 3º e 4º de Primaria, pertencentes á Categoría D presentaron un total de 29 traballos.

Na Categoría E: 5º e 6º de Primaria presentáronse un total de 29 relatos.

O alumnado de 1º e 2º de ESO –Categoría F- presentaron un total de 15 traballos e na Categoría G –alumnado de 3º e 4º de ESO- foron 7 os participantes.

Nas bases do certame establecérase que a temática dos relatos era libre valorándose que incidiran preferentemente nas materias de igualdade, a diversidade, a tolerancia, o respecto e a prevención da violencia de xénero como valores esenciais para a convivencia entre homes e mulleres; na recollida de historias e lendas locais transmitidas oralmente de avós/avoas a pais/nais, a fillos/as e a netos/as que favorezan o coñecemento do patrimonio inmaterial de Pazos de Borbén; e na recollida de toponimia e microtoponimia dos lugares, barrios e parroquias do concello.

Desde que convocamos esta 6ª edición do certame, intentamos animar ao profesorado, pais, nais e demais familiares do alumnado e á dirección, persoal, etc., dos centros educativos e de atención a persoas con diversidade funcional para que estimularan a escribir e a participar nesta nova edición do certame a todo o alumnado e os usuarios destes centros; e parece que, de novo, resultado foi moi satisfactorio.

Para motivar á participación realizáronse 13 sesións de dous Obradoiros de Creación Literaria denominados “Escribir para contar 3” e “Relatos de ida e volta. Facer e desfacer historias”, impartidos, respectivamente, polos escritores Miguel Anxo Alonso Díz e Andrea Barreira Freije; aos que asistiron os usuarios da Asociación Aspavi e todo o alumnado de Infantil, Primaria e ESO do CPI “Curros Enríquez” de Pazos e da EEI “A Galeriña” de Nespereira; en total uns 202 escolares dos centros educativos do municipio e uns 30 usuarios da Asociación Aspavi.

O xurado do certame reuniuse o pasado día 29 de Novembro e xa ten decidido ás premiadas e premiados nesta 6ª edición do certame que se darán a coñecer o próximo Xoves 19 de decembro nun acto que se realizará no Auditorio do Concello a partir das 13:00 horas e no que participarán ademais dos participantes no certame, mestres, monitores, etc., o Alcalde do Concello e outros membros da corporación; os membros do xurado; e representación da Deputación Provincial de Pontevedra.

Por último comentar que esta actividade enmárcase no programa de actividades de dinamización da Lingua Galega do ano 2024 "OBRADOIROS E CERTAME DE CREACIÓN LITERARIA" organizado pola Biblioteca Pública Municipal do Concello de Pazos de Borbén e que conta coa axuda e patrocinio do Servizo de Normalización Lingüística e Servizos Lingüísticos da Deputación Provincial de Pontevedra.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

"ELAS" de VERO RILO para continuar conmemorando o MES DA TRADICIÓN ORAL en Pazos de Borbén

E seguimos conmemorando o MES DA TRADICIÓN ORAL con outra actividade incluída no circuíto +ESCÉNICAS de apoio á programación de artes escénicas en galego nos concellos da provincia de Pontevedra que organiza o Servizo de Cultura da Deputación Provincial en colaboración cos concellos co fin de promover o impulso e o fomento da cultura galega nas súas múltiples e variadas expresións, así como a creación e a difusión artística, favorecendo o uso e a convivencia na nosa lingua.

VERO RILO achegaranos o seu espectáculo "ELAS" o Sábado 23 de Novembro ás 20:00 horas no Auditorio do Concello de Pazos de Borbén, no día que tamén se conmemora o DÍA INTERNACIONAL DA PALABRA e uns días antes das conmemoracións do DÍA INTERNACIONAL PARA A ELIMINACIÓN DA VIOLENCIA CONTRA A MULLER, por iso que mellor que conmemorar estas datas con este espectáculo de Vero Rilo, para público familiar, ao que estades todas e todos convidados.

En "ELAS" Vero Rilo contaranos unha selección de historias de vida, de autora, tradicionais e de recollida da voz das mulleres que non tiveron nome pero que son cada unha de nós.

A obra presenta unha serie de escenas nas que Vero Rilo vai interpretando a cinco mulleres, con diferentes historias e vivencias que van dende a infancia até a idade adulta. “Elas” aborda temas como a loita feminista, a violencia de xénero, a maternidade, a sexualidade e as relacións interpersoais, entre outros.

A entrada é de balde ata completar o aforo do local.

ANIMÁDEVOS.

NON VOS ESQUEZADES, ESPERÁMOSVOS!!!

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

"CONTOS NA LAREIRA" de Iván Davila para conmemorar o MES DA TRADICIÓN ORAL

Comezamos as actividades para conmemorar o MES DA TRADICIÓN ORAL cunha actividade que forma parte do circuíto +ESCÉNICAS de apoio á programación de artes escénicas en galego nos concellos da provincia de Pontevedra que organiza o Servizo de Cultura da Deputación Provincial en colaboración cos concellos co fin de promover o impulso e o fomento da cultura galega nas súas múltiples e variadas expresións, así como a creación e a difusión artística, favorecendo o uso e a convivencia na nosa lingua.

"CONTOS NA LAREIRA" de IVÁN DAVILA, un espectáculo de narración oral para todos os públicos, terá lugar o próximo Sábado 2 de Novembro ás 18:00 horas no Auditorio do Concello.

Fai anos, durante o inverno, as familias e os amigos reuníanse ao carón dunha lareira e contaban historias para entrar en calor. Descobre os contos de tradición oral onde a maxia, o misterio e o paranormal danse a man. Historias tradicionais repletas de chiscadelas ó presente.

Trataranse temas como o coidado da natureza, a reciclaxe, a exaltación da lingua, a igualdade e a boa comunicación como resolución de conflictos.

Por certo, a entrada é de balde ata completar o aforo do local.

Non vos esquezades, esperámosvos!!!

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

AVANCE DAS PRÓXIMAS ACTIVIDADES DE NOVEMBRO COAS QUE CONMEMORAREMOS O MES DA TRADICIÓN ORAL

No próximo mes de Novembro conmemoraremos o MES DA TRADICIÓN ORAL con diversos eventos dos que pasamos a informarvos para que non vos esquezades de asistir aos mesmos.

As actividades forman parte do circuíto +ESCÉNICAS de apoio á programación de artes escénicas en galego nos concellos da provincia de Pontevedra que organiza o Servizo de Cultura da Deputación Provincial co fin de promover o impulso e o fomento da cultura galega nas súas múltiples e variadas expresións, así como a creación e a difusión artística, favorecendo o uso e a convivencia na nosa lingua. 

"CONTOS NA LAREIRA" con IVÁN DAVILA

A primeira será o Sábado 2 de Novembro ás 18:00 horas no Auditorio do Concello e nela IVÁN DAVILA traerános "CONTOS NA LAREIRA", un espectáculo de narración oral para todos os públicos:

Fai anos, durante o inverno, as familias e os amigos reuníanse ao carón dunha lareira e contaban historias para entrar en calor. Descobre os contos de tradición oral onde a maxia, o misterio e o paranormal danse a man. Historias tradicionais repletas de chiscadelas ó presente.

Trataranse temas como o coidado da natureza, a reciclaxe, a exaltación da lingua, a igualdade e a boa comunicación como resolución de conflictos.

"ELAS" con VERO RILO

Seguiremos conmemorando o MES DA TRADICIÓN ORAL o Sábado 23 de Novembro ás 20:00 horas e tamén no Auditorio do Concello de Pazos de Borbén no que contaremos coa visita de VERO RILO que co seu espectáculo "ELAS", contaranos unha selección de historias de vida, de autora, tradicionais e de recollida da voz das mulleres que non tiveron nome pero que son cada unha de nós. A obra presenta unha serie de escenas nas que Vero Rilo vai interpretando a cinco mulleres, con diferentes historias e vivencias que van dende a infancia até a idade adulta. “Elas” aborda temas como a loita feminista, a violencia de xénero, a maternidade, a sexualidade e as relacións interpersoais, entre outros.

E, por último, ahí vai tamén un avance dalgunhas das actividades que estamos organizado para o mes de DECEMBRO:

ENTREGA DE PREMIOS DO "VI CERTAME DE RELATO CURTO" DE PAZOS DE BORBÉN

O Xoves 19 de Decembro sobre ás 12:00 horas no Auditorio do Concello temos previsto o acto de entrega de premios do VI Certame de Relato Curto de Pazos de Borbén no que participarán os escolares do CPI “Curros Enríquez” de Pazos, da EEI “A Galeriña” de Nespereira; e os usuarios da Asociación ASPAVI.

"CONCERTO PUNKINFANTIL" con PETER PUNK PALLASO e BRAIS DAS HORTAS

E o Sábado 21 de Decembro a partir das 18:00 horas tamén no Auditorio do Concello á compañía PETER PUNK PALLASO e BRAIS DAS HORTAS que nos ofrecerán o seu "CONCERTO PUNKINFANTIL" para todos os públicos.

Punk para nenas? Porque non? Que hai máis punk ca unha nena? O punk é rebeldía, é pensar por tí mesma. Do it Yourself!!

Punk para nenas? Por que non?! E logo? Que hai máis punk ca unha nena?

O punk é rebeldía, é pensar por ti mesma. Do it Yourself!! Faino ti ao teu xeito!! Como poidas, como queiras e como che preste! O punk é ir a contracorrente, non ser coma a maioría porque cada unha de nós é diferente. O punk é berrar, rir, facer pis... e tamén escribir as túas propias cancións, facer a túa banda, atopar a túa personalidade. O punk é protestar. Quen non chora, non mama!! Sabemos o que queremos, sabemos o que non queremos e estamos dispostas a chorar, cagar e patexar!! Se non podemos xogar, non é a nosa revolución!

Un cantante punk e un cantante infantil condenados a compartir escenario acaban creando un delirio musical chamado "Concerto Punklnfantil".

Tras descubrirse e recoñecerse van confluíndo, progresivamente, nun espazo común dando como resultado este espectáculo musical e de clown para todos os públicos, no que está presente o concepto punk máis alá dos aspectos máis superficiais. Vencellado directamente co mundo infantil e as inquedanzas das cativas e cativos.

Todas as actividades son con entrada de balde ata completar o aforo do local.

Non vos esquezades, esperámosvos!!!

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

CÓMO SE FIXO "CINZA" charla a cargo de Manel Cráneo e Xaviel Alcalá sobre o proceso de creación desta novela gráfica - Programa "falaRedes" da Rede de Dinamización Lingüística

Continuamos coa programación da Biblioteca Pública Municipal do Concello de Pazos de Borbén do mes de outubro e para a semana que ven temos prevista a seguinte actividade en colaboración coa Rede de Dinamización Lingüística enmarcada no programa de dinamización lingüística falaRedes da Secretaría Xeral de Política Lingüística da Xunta de Galicia.

Como se fixo "Cinza" é unha charla que será impartida polos autores Xavier Alcalá e Manel Cráneo ao alumnado de 3º e 4º de ESO do CPI "Curros Enríquez" de Pazos o próximo Mércores 23 de outubro a partir das 13:10 horas nas instalacións do centro educativo.

O escritor da novela orixinal “A nosa cinza”, Xavier Alcalá, e o autor da adaptación á novela gráfica, Manel Cráneo, explicarán o seu proceso de traballo de como un “long-seller” que figura entre os libros mais vendidos da literatura galega, pasa ao formato novela gráfica.

A actividade estará apoiada pola proxección de materiais visuais que amosan a investigación gráfica que hai detrás da obra (fotografías antigas, story board, bosquexos previos, proceso de debuxo, anotacións e páxinas do guión).

Unha viaxe polas entrañas do proceso creativo da obra.

“Queimémonos,
Mais garde calor de presenza a nosa cinza
Na marcha sen final do tempo.”

“Cinza” é a adaptación de Manel Cráneo do “long-seller” “A nosa cinza”, de Xavier Alcalá, con máis de 80.000 exemplares vendidos. Conta a vida de Xoán, un rapaz criado durante a ditadura franquista, orfo de nai, fillo de médico, de familia galeguista. Durante dez cursos escolares na cidade, con vacacións na aldea, que se vai convertendo nun lugar de moda para o veraneo, vemos a Xoán medrar no duro contexto do seu tempo. Os anos de escola e instituto marcan a transición do neno inocente ao mozo que se ha de enfrontar aos designios da vida para cortar o cordón umbilical coa súa familia.

Unha obra universal e intemporal chea de referencias polos temas que a vertebran: a morte, a amizade, os excesos da relixión e a dureza dun réxime totalitario. A morta asalta o protagonista desde cativo; o sexo xórdelle como premio inalcanzable; a amizade corre paralela a unha violencia que ensombrece a vida do neno e do adolescente; o fundamentalismo relixioso acosa, abafa os sentimentos; imponse a Formación do Espírito Nacional Católico empeñado en agochar o galeguismo.

Informamos que tanto a novela gráfica "Cinza", un volume de 136 páxinas a branco e negro; e a novela orixinal "A nosa cinza" están a disposición das usuarias e usuarios da Biblioteca no noso catálogo.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

OBRADOIRO DE CREACIÓN LITERARIA "RELATOS DE IDA E VOLTA. Facer e desfacer historias" impartido pola escritora ANDREA BARREIRA FREIJE para o alumnado de ESO do CPI "Curros Enríquez" de Pazos

Ola de novo seguidoras/es, usuarias/os e socias/os da Biblioteca Pública Municipal do Concello de Pazos de Borbén "BIBLIOPAZOS".

Seguimos informando das actividades organizadas para este mes de outubro a través do programa de actividades de dinamización da Lingua Galega do ano 2024 "OBRADOIROS E CERTAME DE CREACIÓN LITERARIA" e que contan co patrocinio do Servizo de Normalización Lingüística e Servizos Lingüísticos da Deputación Provincial de Pontevedra.

Os principais obxectivos deste programa son os de promover e dinamizar o uso da lingua galega no municipio, sobre todo entre a poboación infantil, a mocidade e as persoas con diversidade funcional; animando á creación literaria e á lectura a través da realización de diversos obradoiros e da convocatoria dunha nova edición dun certame literario en lingua galega; ademais tamén se pretende promover e facilitar a plena integración na sociedade dos colectivos en risco de exclusión social e con diversidade funcional, a través do emprego da expresión artística e literaria en lingua galega.

O próximo Luns 7 de outubro comenza o obradoiro "RELATOS DE IDA E VOLTA. FACER E DESFACER HISTORIAS” que será impartido pola escritora, xornalista e docente ANDREA BARREIRA FREIJE para todo o alumnado de ESO do CPI “Curros Enríquez” de Pazos; e realizarase tamén nas instalacións do colexio en catro sesións dunha duración de hora e media cada unha nas seguintes datas e horarios:

Luns, 7 de outubro
10:20 a 11:50 - 1º ESO
12:20 a 13:50 - 2º ESO

Martes, 8 de outubro
10:20 a 11:50 - 3º ESO
12:20 a 13:50 - 4º ESO

Escribir, desde un relato a unha novela, é algo traballoso, que se vai pulindo e mellorando cos anos. Aínda que partamos do básico, que é ser quen de observar o que nos rodea, pensar e imaxinar, precisamos dunhas ferramentas que, primeiro nos axuden a ordenar a información e, despois, elementos que fagan que a nosa historia sexa o máis atractiva posible.

Nos cursos de narrativa preguntámonos: Quen conta a historia? O Narrador, pero cantos tipos de narradores hai? Quen marca a acción? A personaxes; pero que papel lles imos dar? Onde e cando acontece todo? Espazo e tempo, pero como se relaciona cos demais elementos? Como estruturamos o relato? Tempo e trama... Onde poñemos cada xiro?

Así, Relatos de ida e volta. Facer e desfacer historias é un obradoiro de escrita que funciona como un xogo adaptado a cada curso. A través de varios pasos, que van desde a capacidade de atopar ideas a través de preguntas, observación, imaxinación á escrita, mergullámonos nas capacidades e intereses propios á hora de escribir un relato.

A partir de aí descubrimos cada elemento narrativo e como podemos mesturalos para facer unha historia o máis atractiva e interesante posible. Deste xeito, veremos como segundo a tipoloxía das personaxes ou dos narradores, as voces cambian; igual que mudan segundo onde cando sucedan. Cada elemento ten o seu papel, e coñecelo fará que escribir unha historia sexa algo fluído e cada vez máis natural.

Relatos de ida e volta. Facer e desfacer historias remata coa lectura dos textos, o que permite a capacidade crítica da aula, sempre dun xeito construtivo. Esa ollada externa axuda a mellorar os escritos. Malia que o proceso sexa individual, contar co apoio da aula, sempre é un bo xeito de evitar bloqueos creativos e ter varias opcións que axuden a avanzar e facer o proxecto o máis interesante e próximo ao lector ou lectora.

O obradoiro impartirase en 4 sesións de 90 minutos cada unha para a rapazada entre 1º a 4º da ESO. Cada persoa escribirá un relato, no que se mesturarán as temáticas do VI Certame de Relato Curto de Pazos de Borben, coas ferramentas máis básicas da creación narrativa e aquelas que lles permitan arriscar nas voces narradoras ou nos xiros das historias

1º ESO: Este curso, ao ser o primeiro ano que recibe o obradoiro, descubrirán os elementos básicos para a construción dun relato: que é narrador, as personaxes, o espazo, o tempo ea trama lineal, todo a través do xogo.

2º ESO: Tras descubrir o ano anterior as bases do relato, no presente obradoiro descubriremos novas ferramentas, centrándonos principalmente en como adaptar as ideas, puntos de partida, do concurso municipal ás nosas propias inquedanzas como escritoras e escritores.

3º e 4º ESO: Nestes cursos profundaremos en como podemos xogar coas estruturas (inversa e circular principalmente, aínda que tamén in media res) e variar principios e finais, para poder experimentar cos xiros e descubrir outras formas de contar.

Para calquera información sobre a programación podedes contactar coa Biblioteca por teléfono chamando ao número 986497273 ou por correo electrónico a biblioteca@pazosdeborben.gal no noso horario habitual de apertura.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

CONVOCATORIA DO "VI CERTAME DE RELATO CURTO DE PAZOS DE BORBÉN"

O pasado 26 de setembro demos conta a través deste Blog e das Redes Sociais da Biblioteca das actividades que se van a realizar durante os meses de setembro-outubro e, entre elas está a convocatoria do "VI CERTAME DE RELATO CURTO DE PAZOS DE BORBÉN".

Nesta 6ª edición do certame poderá participar todo o alumnado de Educación Infantil, Primaria e Secundaria residente no municipio que estivera ou estea cursando estudos de Infantil, Primaria ou Secundaria nos colexios públicos do municipio durante os cursos 2022/2023 e/ou 2023/2024; e tamén os usuarios dos Centros de Atención a Persoas con Diversidade Funcional que teñan a súa sede e actividade no municipio de Pazos de Borbén.

Coa convocatoria desta nova edición pretendemos seguir animando á creación literaria, á escrita e á lectura en lingua galega; fomentar a creatividade e potenciar a expresión e a comprensión escritas, estimulando o uso da lingua galega entre os escolares e os mais mozos, así como tamén do colectivo de persoas con diversidade funcional, facilitándolles a súa consecución mediante esta motivación como é a de participar nun certame literario no ámbito do relato breve.

As categorías para participar son, como na pasada edición do certame, sete (7) categorías que se detallan de seguido:

• Categoría A: Persoas con diversidade funcional
• Categoría B: Alumnado de Educación Infantil
• Categoría C: Alumnado de 1º e 2º de Primaria
• Categoría D: Alumnado de 3º e 4º de Primaria
• Categoría E: Alumnado de 5º e 6º de Primaria
• Categoría F: Alumnado de 1º e 2º de ESO
• Categoría G: Alumnado de 3º e 4º de ESO

O prazo para presentar os traballos será do 1 de outubro e o 15 de Novembro de 2024.

Os participantes poderán presentar un único traballo (debuxo ou relato) que deberá ser orixinal, inédito, ESCRITO EN LINGUA GALEGA e non premiado dentro do prazo estipulado nas bases do certame e que deberán entregar na Biblioteca.

Os participantes na Categoría A: Persoas con diversidade funcional poderán presentar un debuxo nunha folla tamaño A4 por unha soa cara que inclúa unha ou máis frases alusivas ao mesmo; ou un relato escrito que se entregará en formato A4 por unha soa cara, manuscrito en letra clara ou ben impreso en tipo letra Arial, tamaño 14 puntos e entreliñado 1,5 liñas. A extensión mínima será dunha (1) páxina e máxima de dúas (2) páxinas.

As persoas participantes na Categoría B: Alumnado de Educación Infantil poderán presentar un debuxo nunha folla tamaño A4 por unha soa cara.

As persoas participantes na Categoría C: Alumnado de 1º e 2º de primaria poderán presentar un debuxo nunha folla tamaño A4 por unha soa cara que inclúa unha ou dúas frases alusivas ao debuxo presentado.

As persoas participantes nas restantes categorías deberán presentar os traballos (un relato) en papel e entregaranse en formato A4 por unha soa cara, manuscritos en letra clara ou ben impresos en tipo de letra Arial, tamaño 14 puntos e entreliñado 1,5 liñas. A extensión mínima será dunha (1) páxina e máxima de catro (4) páxinas.

A temática dos relatos será LIBRE pero valorarase que incidan preferentemente nas seguintes materias:

• A igualdade, a diversidade, a tolerancia, o respecto e a prevención da violencia de xénero como valores esenciais para a convivencia entre homes e mulleres.
• A recollida de historias e lendas locais transmitidas oralmente de avós/avoas a pais/nais, a fillos/as e a netos/as que favorezan o coñecemento do patrimonio inmaterial de Pazos de Borbén.
• A recollida de toponimia e microtoponimia dos lugares, barrios eparroquias do concello.

Haberá dous premios por cada categoría que consistirán en:

Categoría A: Persoas con diversidade funcional

1º premio: Un libro ou tableta electrónica+un lote de libros.

2º premio: Un lote de libros.

Categoría B: Alumnado de Educación Infantil

1º e 2º premios: Un lote de libros.

Resto das categorías (C, D, E, F, e G)

1º premio: Un libro ou tableta electrónica+un lote de libros.

2º premio: Un lote de libros.

Co obxecto de fomentar a lectura en lingua galega e o traballo cooperativo entregarase tamén un lote de libros a cada unha das aulas do colexio e aos centros de atención a persoas con diversidade funcional que presenten máis de catro participantes ao certame. Ademaís todos os participantes non premiados recibirán un libro de agasallo.

Para máis información sobre o "VI CERTAME DE RELATO CURTO DE PAZOS DE BORBÉN" podes descargar as BASES do certame facendo click AQUÍ.

Desde BIBLIOPAZOS animamos a todo o profesorado, aos pais, nais e demáis familiares do alumnado e á dirección, persoal, etc., dos Centros de atención a persoas con diversiade funcional do concello para que os estimulen a escribir e a participar neste nova convocatoria do certame que chega a súa 5º edición.

Esta actividade enmárcase no programa de actividades de dinamización da Lingua Galega do ano 2024 "OBRADOIROS E CERTAME DE CREACIÓN LITERARIA" organizado pola Biblioteca Pública Municipal do Concello de Pazos de Borbén e que conta co patrocinio do Servizo de Normalización Lingüística e Servizos Lingüísticos da Deputación Provincial de Pontevedra.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA.

O escritor MIGUEL ALONSO DIZ impartirá o Obradoiro de Creación Literaria "ESCRIBIR PARA CONTAR 3" a todo o alumnado de Infantil e Primaria e aos usuarios da Asociación ASPAVI

Ola outra vez seguidoras/es, usuarias/os e socias/os da Biblioteca Pública Municipal do Concello de Pazos de Borbén "BIBLIOPAZOS".

Continuamos con novas actividades que temos organizadas para as vindeiras semanas a través do programa de actividades de dinamización da Lingua Galega do ano 2024 "OBRADOIROS E CERTAME DE CREACIÓN LITERARIA" e que contan co co patrocinio do Servizo de Normalización Lingüística e Servizos Lingüísticos da Deputación Provincial de Pontevedra.

Os principais obxectivos deste programa son os de promover e dinamizar o uso da lingua galega no municipio, sobre todo entre a poboación infantil, a mocidade e as persoas con diversidade funcional; animando á creación literaria e á lectura a través da realización de diversos obradoiros e da convocatoria dunha nova edición dun certame literario en lingua galega; ademais tamén se pretende promover e facilitar a plena integración na sociedade dos colectivos en risco de exclusión social e con diversidade funcional, a través do emprego da expresión artística e literaria en lingua galega.

O primeiro Obradoiro de Creación Literaria que dará comezo o Venres 27 de setembro será "ESCRIBIR PARA CONTAR 3" que impartirá o escritor, poeta, docente e contacontos MIGUEL ALONSO DIZ e nel participará todo o alumnado de Infantil e Primaria do CPI "Curros Enríquez" de Pazos; o alumnado de Educación Infantil da EEI "A Galeriña" de Nespereira; e os usuarios da Asociación ASPAVI.

Realizarase nas instalacións escolares e da Asociación ASPAVI en 9 sesións de entre 50 e 90 minutos cada unha delas nos seguintes días e  horarios:

Venres, 27 de Setembro:
13:00 a 14:30 - 4º de Primaria CPI Pazos

Xoves, 3 de Outubro:
13:00 a 14:30 - 5º de Primaria CPI Pazos

Venres, 4 de Outubro:
13.00 a 14:30 - 3º de Primaria CPI Pazos

Xoves, 10 de Outubro:
13:00 a 14:30 - 6º de Primaria CPI Pazos

Venres, 11 de Outubro:
13:00 a 13:50 - Infantil CPI Pazos

Luns, 14 de Outubro:
10:30 a 11:45 - 1º de Primaria CPI Pazos
13:00 a 14:15 - 2º de Primaria CPI Pazos

Xoves, 17 de Outubro:
13:00 a 13:50 - Infantil EEI A Galeriña
15:30 a 17:00 - Asociación ASPAVI

Dando continuidade aos obradoiros “ESCRIBIR PARA CONTAR 2” realizados no ano 2023, nesta nova edición ensínase ao alumnado participante os procesos de creación. Camiñando pola palabra, tanto escrita como oral, a imaxe e mesmo a expresión teatral para dotar dunha visión o máis completa posible; sempre adaptándose ao nivel da rapazada participante e dando resposta ás necesidades de cada grupo e de cada persoa.

Nas actividades búscase fomentar a creatividade, o amor pola arte en xeral e pola nosa lingua.

Todas estas variables xogan un papel relevante no intre de pórse diante da folla en branco.

Dende os ciclos de infantil ata 6º de primaria, pasando polas usuarios dos colectivos de persoas con diversidade funcional, achegaremos a un colectivo de persoas máis amplo o labor desenvolto a través de obradoiros adaptados a cada idade e circunstancia.

Os obxectivos que se pretende conseguir son os seguintes:

• Incentivar a creatividade e o valor da orixinalidade.
• Estimular a creación de historias vencelladas co noso entorno, sementando neles o aprecio e valoración do propio, tanto na súa vertente material (patrimonio histórico), como inmaterial.
• Asociar a escrita ao xogo, e non só a escrita, senón tamén o propio proceso de aprendizaxe.
• Enlazar elementos escritos e de narración visual e conectar a escrita e a narración oral. Incentivar a transmisión oral de historias no seu entorno familiar.
• Incentivar a lectura como motor da escrita. Iniciar no xogo de palabras.
• Escribir como ferramenta de expresión dun mesmo.
• Fomentar o uso da lingua galega.
• O emprego da expresión artística galega como un elemento de expresión integradora na sociedade e de fomento do respecto á diversidade.

Os obradoiros están estruturados en cinco niveis:

- Primeiro nivel: Ciclo de Infantil

Escribir para contar.
Narrar a través da imaxe.

- Segundo nivel: 1º e 2º de Primaria

O valente coello que quixo soñar.
Unha intervención artística.
Que é o protagonista?
Pequenas historias. Debuxamos.

- Terceiro nivel: 3º e 4º de Primaria

Unha historia entre todos.
Mesmas palabras, diferentes historias.
O relato máis curto do mundo.

- Cuarto nivel: 5º e 6º de Primaria

A través de cancións, efectos sonoros, fotografías etextos noutras linguas estimularase a creación literaria por parte do alumnado.

-Quinto nivel: Colectivos de persoas con diversidade funcional

Que queremos contar?
Unha historia entre todos.
Efectos sonoros. Que sucede?
O debuxo como ferramenta de narración.

Para calquera información sobre a programación podedes contactar coa Biblioteca por teléfono chamando ao número 986497273 ou por correo electrónico a biblioteca@pazosdeborben.gal no noso horario habitual de apertura.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA