A BIBLIOTECA PÚBLICA MUNICIPAL DE PAZOS DE BORBÉN - BIBLIOPAZOS recibe un novo premio da Campaña de animación á lectura "MARÍA MOLINER" do ano 2025

¡Boas novas para a biblioteca!

O pasado día 1 de decembro foi un día MOI ESPECIAL para a Biblioteca Pública Municipal de Pazos de Borbén-BiblioPazos, para todos os que traballamos na mesma ao longo destes anos, e tamén para todos aqueles usuarios, persoas, entidades, asociacións e fundacións que colaboran coa mesma habitualmente.

Ese día publicouse na páxina web do Ministerio de Cultura a Resolución definitiva da concesión dos premios Maria Moliner deste ano 2025; e a Biblioteca de Pazos de Borbén foi outro ano mais premiada neste concurso de proxectos de animación á lectura que convoca anualmente o Ministerio de Cultura polo seu proxecto "CONTOS, MAXIA, MÚSICA E LITERATURA: CULTURA E SABIDURÍA”.

O Concurso de proxectos de animación á lectura “MARÍA MOLINER” realizase anualmente grazas ao convenio subscrito entre o Ministerio de Cultura e a Federación Española de Municipios e Provincias, vai dirixido a municipios de menos de 50.000 habitantes, e ata un máximo de 370 proxectos son seleccionados para recibir un premio en metálico para adquirir, principalmente, lotes de libros.

Dos 370 proxectos seleccionados os dez proxectos que obteñan mellor puntuación reciben un premio por un importe individual de 10.000 euros; mentres que os 360 proxectos seguintes por orde de puntuación recibirán un premio por un importe individual de 2.777,77 euros.

O premio obtido pola Biblioteca Pública Municipal de Pazos de Borbén-BiblioPazos consiste na concesión dunha subvención en metálico por importe de 2.777,77 euros destinados á compra de libros para mellora das súas coleccións bibliográficas.

En total 14 bibliotecas da Comunidade Autónoma de Galicia foron premiadas.

Entre as catro bibliotecas premiadas da provincia de Pontevedra, ademais da de Pazos de Borbén, recibiron o premio as bibliotecas dos concellos de O Grove, Mos e Pontecesures.

Na provincia de A Coruña foron premiadas as bibliotecas dos concellos de Ares. Cee e Betanzos; na provincia de Lugo as dos concellos de Sarria Sober, Barreiros, Ribadeo e Antas de Ulla; e na provincia de Ourense as de Verín e Ribadavia.

A todas queremos enviarlles os nosos parabéns pola consecución deses premios e polo traballo realizado.

O certo é que en Pazos de Borbén estamos contentísimos pois das seis veces que nos presentamos ata agora a este concurso, nos anos 2017, 2018, 2021 e 2022, 2024 e 2025 fomos premiados en todas as ocasións.

No proxecto levado a cabo entre os meses de xuño de 2024 a o 8 de maio de 2025 realizáronse un total de 28 actividades (Contacontos, obradoiros literarios, certames literarios, conferencias, etc.) nas que participaron Raquel Queizás, Pablísimo, Fernando Saldaña, Leo Leíño, Fran Campos e Fran Ameixeiras (Bandullo Azul), Miguel Alonso Diz, Andrea Barreira Freije, Xavier Alcalá e Manel Cráneo, Iván Davila, Vero Rilo, Peter Punk Pallaso e Brais das Hortas, Samuel Ferro, Juan Duran Alonso e Soledad Felloza. A todas e todos eles grazas polo seu traballo e profesionalidade e por axudarnos a acadar este premio.

O ter conseguido este novo premio e este recoñecemento pola realización deste proxecto non sería posible sen a aportación económica do Concello de Pazos de Borbén; a Deputación Provincial de Pontevedra e a Consellería de Cultura, Lingua e Xuventude da Xunta de Galicia; e da imprescindible colaboración da Asociación de Pais de Persoas con Discapacidade Intelectual de Vigo (ASPAVI); da directiva, persoal docente e persoal non docente do CPI “Curros Enríquez” de Pazos e da EEI “A Galeriña” de Nespereira.

Grazas a todos e todas pola súa colaboración; aos socios e usuarios da biblioteca, persoal do concello, e todas aquelas persoas e institucións que de algunha forma participaron e colaboraron para levar adiante este proxecto premiado.

GRAZAS, GRAZAS, MOITÍSIMAS GRAZAS.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

BIBLIOPAZOS RECIBE UN DOS PREMIOS MARIA MOLINER DE 2021

¡Boas novas para a biblioteca!

O pasado día 19 de novembro foi un día MOI ESPECIAL para a Biblioteca Pública Municipal de Pazos de Borbén-BiblioPazos e para todos os que traballamos na mesma ao longo deste ano 2021.

Ese día comunicáronnos por correo electrónico que se publicara na páxina web do Ministerio de Cultura e Deporte a Orde de Concesión dos premios Maria Moliner deste ano; e que a Biblioteca de Pazos de Borbén foi outro ano mais premiada neste concurso de proxectos de Animación á Lectura que convoca anualmente o Ministerio de Cultura e Deporte polo seu proxecto "Continúa a vida con contos, cancións, natureza e lectura”.

O Concurso de Proxectos de Animación á Lectura “María Moliner” realizase anualmente grazas ao convenio subscrito entre o Ministerio de Cultura e Deporte e a Federación Española de Municipios e Provincias, vai dirixido a municipios de menos de 50.000 habitantes, e ata un máximo de 370 proxectos son seleccionados para recibir un premio en metálico para adquirir, principalmente, lotes de libros.

Neste ano 2021 a celebración desta campaña resulta de maior relevancia se cabe dado que se cumpren 40 anos do pasamento de María Moliner, bibliotecaria e filógoga excepcional, de maneira que se recollen nesta convocatoria unha especial valoración dos proxectos e actividades realizados desde as bibliotecas en recordo da súa figura e da súa obra.

Dos 370 proxectos seleccionados os dez que obteñan mellor puntuación recibirán un premio por un importe individual de 10.000 euros; mentres que os 360 seguintes por orde de puntuación recibirán un premio por un importe individual de 2.014,69 euros.

O premio obtido pola Biblioteca Pública Municipal de Pazos de Borbén consiste na concesión dunha subvención en  metálico por importe de 2.014,69 euros para a compra de libros para mellora das súas coleccións bibliográficas.

Entre as seis bibliotecas premiadas da provincia de Pontevedra, ademais da de Pazos de Borbén, tamén recibiron o premio as dos Concellos de Soutomaior, de Campo Lameiro, de Poio e de Ponteareas co mesmo premio de 2.014,69 euros cada unha delas; e a Biblioteca Municipal do Concello de O Grove cun premio especial de 10.000,00 euros.

Na provincia de A Coruña foron premiadas as bibliotecas dos Concellos de Ares e Laracha; na provincia de Lugo as dos Concellos de Xermade e Sober; e na provincia de Ourense as dos Concellos de Esgos, Ribadavia e Verín.

A todas queremos enviarlles os nosos parabéns e sobre todo á de O Grove pola consecución dese premio especial entre todas as bibliotecas que se presentaron de Galicia.

O certo é que estamos contentísimos pois das tres veces que nos presentamos ata agora a este concurso, nos anos 2017, 2018 e 2021, fomos premiados nas tres ocasións.

No proxecto realizado entre os meses de xaneiro a xuño fixéronse diversas actividades (Contacontos, encontros con autores, obradoiros literarios, conferencias, etc.) nas que participaron as contadoras Raquel Queizás e Ana Facchini; os contadores Brais das Hortas e Anxo Moure -a través do Festival Inernacional de Narración Oral "Atlántica" no que participou outro ano máis o Concello de Pazos de Borbén- e Felipe Díaz Valle “Caxoto Contacontos”; os escritores Miguel Anxo Alonso Diz e Rodrigo Costoya Santos; as interpretes de lingua de signos Aranzazu Casas e María Costa de “AZ Lengua de signos”; o Mago Paco (Galicia), Mago Marcos Ortega (Navarra), o Mago Guillermo Avilés (Murcia), o Mago Julianini (Cantabria); e o arqueólogo Xurxo Constela de A Citania Arqueoloxía.

O ter conseguido este novo premio e este recoñecemento pola realización deste proxecto non sería posible sen a aportación económica do Concello de Pazos de Borbén e da Fundación Filomena Rivero Alonso de Redondela; e sen a imprescindible colaboración da Asociación de Pais de Persoas con Discapacidade Intelectual de Vigo (ASPAVI); da directiva, persoal docente e persoal non docente do CPI “Curros Enríquez” de Pazos e da EEI “A Galeriña” de Nespereira; do escritor Rodrigo Costoya Santos, brillante gañador do “IX Certamen de Novela Histórica Ciudad de Úbeda (2020)” polas facilidades que nos deu para achegarse a Pazos de Borbén e impartir a conferencia “A incrible historia do galego Cristovo Colón. De Poio a baiona”; e da directiva da Comunidade de Montes en Man Común da parroquia de Amoedo polo traballo e facilidades que nos deron para poder realizar o roteiro pola Senda Arqueolóxica de Amoedo para coñecer parte do patrimonio arqueolóxico e histórico do noso concello.

Grazas a todos e todas pola súa colaboración; aos socios e usuarios da biblioteca, compañeiros de traballo, e todas aquelas persoas e institucións que de algunha forma participaron e colaboraron para levar adiante este proxecto premiado.

GRAZAS, GRAZAS, GRAZAS

BIBLIOPAZOS RECIBE UN DOS PREMIOS MARIA MOLINER DE 2018

O pasado día 31 de outubro de 2018 foi outro día MOI ESPECIAL para a Biblioteca Pública Municipal do Concello de Pazos de Borbén - BIBLIOPAZOS e para o persoal que traballamos na mesma e para todas aqueles usuarios, persoas, entidades, asociacións e fundacións que colaboran coa mesma habitualmente.

Ese día comunicáronnos por correo electrónico dende a Subdirección Xeral do Libro, a Lectura e as Letras Españolas do Ministerio de Cultura e Deporte que a biblioteca fora unha das seleccionadas pola Comisión de Valoración da Campaña María Moliner de 2018 como beneficiaria dunha subvención en metálico de 1.706,66 euros para a compra de libros, ou sexa, que gañáramos un dos premios da XIX Campaña de animación á lectura María Moliner, convocada polo Ministerio de Cultura e Deporte, a Federación Española de Municipios e Provincias (FEMP), e a Fundación Banco Santander.

Entre os premiados de 2018 atópanse 14 bibliotecas galegas, e entre esas 14 bibliotecas galegas está, por segundo ano consecutivo, a de Pazos de Borbén BIBLIOPAZOS no posto nº 16 das 300 seleccionadas con 78 puntos.

É o segundo ano que nos presentamos a estes premios e estamos moi contentos de ter recibido este recoñecemento á labor bibliotecaria no noso concello polo proxecto presentado: "Mulleres, Ciencia, Patrimonio e Tradición", un proxecto que abarcou un montón de actividades ao longo de todo o ano 2018 cos obxectivos de:

• Achegar á biblioteca aos cidadáns e cidadás.
• Promover e dinamizar o uso da lingua galega.
• Fomentar a animación a lectura a través dun programa de promoción da tradición oral galega.
• Seguir promocionando e dando a coñecer o Patrimonio natural, arqueolóxico, ecolóxico, histórico, artístico e inmaterial do Concello de Pazos de Borbén.
• Continuar fidelizando usuarios e conquistando novos lectores.
• Renovar permanentemente a colección bibliográfica.
• Proseguir o traballo con colectivos en risco de exclusión social e con diversidade funcional co obxecto de promover a súa plena normalización e integración na sociedade.
• Desenrolar tarefas de alfabetización dixital e formación e novas tecnoloxía da información e comunicación co obxectivo de minorar ao máximo a fenda dixital.
• Levar a cultura ao maior número posible de cidadáns e cidadás, intentando conseguir cada ano un maior número de asistentes ás actividades.
• Intentar que o maior número de usuarios se sinta atraído pola lectura e que poidan atopar na biblioteca e nos libros unha fonte de formación, de educación e de entretemento moi proveitoso para o seu desenrolo como persoas ao longo da súa vida.
• Facer da Biblioteca Pública Municipal un lugar de ocio e cultura importante no municipio, un espazo no que os veciños de tódas as idades poidan fomentar o seu gusto pola lectura, pola cultura e polo coñecemento en xeral.

Este recoñecemento non sería posible sen a colaboración de moitas entidades coas que queremos compartir e facer extensivo o mesmo pola súa axuda desinteresada na realización e organización das actividades e/ou o patrocinio das mesmas:

• Abanca.
• Asociación de Pais de persoas con discapacidade intelectual de Vigo (ASPAVI).
• Concello de Pazos de Borbén: Axencia de Emprego e Desenvolvemento Local, Concellería de Cultura, Departamentos de Servizos Sociais, Servizos Xerais, Vías e Obras; e Oficina de Información Xuvenil.
• Colexio Público Integrado "Curros Enríquez" de Pazos.
• Deputación Provincial de Pontevedra.
• Escola de Educación Infantil "A Galeriña" de Nespereira.
• Fundación Filomena Rivero Alonso de Redondela
• Rede de Dinamización Lingüística.
• Xunta de Galicia.

Tampouco sería posible sen a colaboración de moitas persoas coas que tamén queremos compartir e facer extensivo o mesmo pola súa axuda desinteresada na realización e organización das actividades, vai por vos:

• A todo o persoal directivo, profesorado e persoal non docente do CPI "Curros Enríquez" de Pazos e, en especial aos mestres Uxía Porrit Lueiro e Manuel Gonzalez Pastoriza.
• Eli Ríos, escritora.
• Raquel Queizás, actriz e contadora de historias.

E, por último, agraceder tamén a todos os profesionais que participaron nas actividades de BiblioPazos e as fixeron posible.

Este concurso de carácter estatal ten por obxecto premiar a aquelas bibliotecas de concellos de menos de 50.000 habitantes que leven a cabo proxectos de animación á lectura, especialmente entre nenos e xóvenes, así como actividades de integración social con poboación en risco de exclusión social ou con algún tipo de diversidade funcional, e proxectos de boas prácticas na labor bibliotecaria.

Presentáronse 549 proxectos e a comisión de valoración seleccionou aos 300 mellores, tendo en conta criterios como a claridade e o interese do proxecto para a animación lectora, a boa planificación e a viabilidade do proxecto, así como a orixinalidade e a inmersión en novas tecnoloxías que conteña a proposta. A estas 300 bibliotecas outorgaselle un premio de 1.706,66 euros para a compra de libros.

Ademáis concedéronse pola Fundación Banco Santander catro premios especiais, tres deles ás tres bibliotecas que presenten os mellores proxectos con 10.000,00 euros de premio cada unha; e un premio de 6.000,00 euros ao mellor proxecto á integración xeracional (que involucre a persoas de distintas xeracións: nenos, anciáns, xóvenes,etc).

Desde BIBLIOPAZOS queremos felicitar ás 14 bibliotecas galegas seleccionadas polo seu bo traballo de dinamización e animación á lectura e animalas a continuar nesa liña no futuro. Animar tamén a aquelas outras que presentaron os seus programas e que non foron seleccionadas para que sigan facendo esta importante labor bibliotecaria a favor da educación, da cultura e da lectura.

MÁIS INFORMACIÓN:

• Listaxe das bibliotecas seleccionadas.
• Páxina web da convocatoria.

GRAZAS, POR ÚLTIMO, ÁS/AOS SOCIAS/OS E USUARIAS/OS DA BIBLIOTECA SEN OS QUE ÉSTA NON TERÍA NINGUNHA RAZÓN PARA EXISTIR.

BIBLIOPAZOS RECIBE UN DOS PREMIOS MARIA MOLINER 2017

O pasado día 24 de outubro foi un día MOI ESPECIAL para a Biblioteca Pública Municipal de Pazos de Borbén - BiblioPazos e para o persoal que traballamos na mesma.

Ese día coincidindo coa celebración do DÍA DA BIBLIOTECA déronse a coñecer os 300 proxectos premiados na XVIII Campaña de animación á lectura María Moliner 2017, convocada polo Ministerio de Educación, Cultura e Deporte, a Federación Española de Municipios e Provincias e a Fundación Coca-Cola.

Entre os premiados atópanse 14 bibliotecas galegas, e entre esas 14 bibliotecas galegas está a de Pazos de Borbén "BIBLIOPAZOS".

É o primeiro ano que nos presentamos a estes premios e estamos moi ledos de ter recibido este recoñecemento á labor bibliotecaria no noso concello polo proxecto presentado: "Conta, canta, le e aprende na natureza".

Este recoñecemento non sería posible sen a colaboración de moitas entidades e persoas coas que queremos compartir e facer extensivo o mesmo pola súa axuda na realización e organización das actividades e/ou o patrocinio das mesmas:

• Deputación Provincial de Pontevedra.
• Secretaría Xeral de Cultura e Secretaría Xeral de Política Lingüística da Consellería de Cultura, Educación e Ordenación Universitaria da Xunta de Galicia.
• Fundación Filomena Rivero Alonso de Redondela.
• Centro Público Integrado "Curros Enríquez" de Pazos.
• Escola de Educación Infantil "A Galeriña" de Nespereira.
• Bibliotecas do Concello de Redondela.
• Biblioteca do Concello de Soutomaior.
• Biblioteca de Híjar-Las Gabias (Granada).
• Oficina de Información Xuvenil, Axencia de Emprego e Devenvolvemento Local, Concellería de Cultura, departamentos de vías e obras, servizos sociais, e oficinas xerais do Concello de Pazos de Borbén.
• Asociación de Pais de personas con discapacidade intelectual de Vigo (ASPAVI).
• Entidade financeira ABANCA.
• Casa Cultural de Amoedo.

O noso especial agradecemento para:

• Uxía Porrit Lueiro, mestra do CPI "Curros Enríquez" de Pazos.
• Alvaro Martínez Leiro, Presidente da Comunidade de Montes de Moscoso.
• Antonio Fernández Costas, Presidente da Comunidade de Montes de Borbén.
• Jorge Alvarez García, veciño de Amoedo.
• Isabel Comesaña Fernández, veciña de Nespereira.
• Ruth Galindo, bibliotecaria de Híjar - Las Gabias (Granada).
• Mª Elena Becerra e Mª José Villar de Bibliotecas de Redondela.
• Ledicia Costas, escritora.

E, por último, agradecer tamén a todos os profesionais que participaron nas actividades de BiblioPazos.

Esta concurso de carácter estatal ten por obxecto premiar a aquelas bibliotecas de concellos de menos de 50.000 habitantes que leven a cabo proxectos de animación á lectura, especialmente entre nenos e xóvenes, así como actividades de integración social con poboación en risco de exclusión social ou con algún tipo de discapacidade, e proxectos de boas prácticas na labor bibliotecaria.

Presentáronse 604 proxectos este ano, e a comisión de valoración seleccionou aos 300 mellores, tendo en conta criterios como a claridade e o interese do proxecto para a animación lectora, a boa planificación e a viabilidade do proxecto, así como a orixinalidade e a inmersión en novas tecnoloxías que conteña a proposta. A estas 300 bibliotecas outorgaselle un premio metálico de 1706,66 euros para a compra de libros.

Ademais, a comisión de valoración concede tres premios especiais dotados con 12.000,00 euros, un para bibliotecas de municipios de menos de 5.000 habitantes, outro para bibliotecas de municipios entre 5.001 e 20.000 habitantes e outro para bibliotecas de municipios entre 20.001 e 50.000 habitantes.

Este ano o premio especial para bibliotecas de municipios entre 5001 e 20000 habitantes foille concedido á Biblioteca Pública Municipal de Verín polo seu proxecto Voluntariado cultural con chic@s para el fomento de la lectura, do cal a comisión de valoración destaca a súa consolidación como un referente cultural na súa localidade, e o seu carácter transfronteirizo levando as actividades da biblioteca a aldeas cercanas de Portugal.

Desde BIBLIOPAZOS queremos felicitar ás 14 bibliotecas galegas seleccionadas, en especial á Biblioteca Pública Municipal de Verín, polo seu bo traballo de dinamización e animación á lectura, e ás bibliotecas veciñas de O Porriño e Redondela.

MÁIS INFORMACIÓN:

 

• Listaxe das bibliotecas seleccionadas

• Páxina web da convocatoria: comisión de valoración e resolución