CONCURSO "UN POEMA NA TÚA VOZ"

Este ano, como en anos anteriores, e con ocasión da celebración o próximo día 2 de abril do DÍA INTERNACIONAL DO LIBRO INFANTIL, a Asociación Galega do Libro Infantil e Xuvenil (GÁLIX), convoca un novo concurso literario, nesta ocasión co fin de incentivar a lectura do xénero poético en galego entre a rapazada, promover e defender a potencialidade expresiva da poesía en voz alta e contribuír á divulgación da creación poética de autoras e autores galegos.

Por mor das circunstancias excepcionais que estamos a vivir, estes días temos pechadas as bibliotecas escolares, as bibliotecas públicas e as librerías. Neste momento no que os nenos e nenas están nas casas coa súa familia, GÁLIX quere animarvos a ler con eles poesía galega, que sexan os rapaces e rapazas as que vola lean e que gravedes as súas lecturas.

Aproveitemos este tempo para ler poesía en galego en familia e, se queredes, participar no concurso

"UN POEMA NA TÚA VOZ"

Velaquí a proposta de GALIX para pasar unha corentena en familia:

• Se tendes entre 6 e 14 anos podedes participar no concurso.
• Escollede un poema tradicional ou de autor.
• Gravádeo cun móbil ou no ordenador (a familia, se quere, pode facervos os efectos de son).
• Mandade o arquivo a galix@galix.org

Lembrade poñer os datos do poema!!

• Título.
• Autoría; ou tradicional, popular, se non ten autora ou autor coñecido.
• Libro de poemas ao que pertence, se fora o caso.
• Editorial, se está publicado.

Datos da(s) persoa(s) lectora(s).

• Nome e apelidos:
• Ano de nacemento:
• Curso escolar:

IMPORTANTE!!!

Se concursades desde a casa poñede os datos da familia.

• Nome e apelidos dunha persoa adulta responsable
• Enderezo.
• Teléfono.
• Correo electrónico de contacto.

 Acceso ás bases modificadas: 

• Bases 
• Ficha de datos 
• Modelo de autorización 

Axúdade a difundir esta nova co portelo:
#Euficonacasa
#Euleonacasa
#concursoDILI

ANIMÁDEVOS A PARTICIPAR!!!

Fonte da información: GÁLIX

23 DE ABRIL - DIA MUNDIAL DO LIBRO E DO DEREITO DE AUTOR

Celébrase hoxe o DÍA MUNDIAL DO LIBRO E DO DEREITO DE AUTOR.

O 23 de abril é un día simbólico para a literatura mundial xa que ese día en 1616 faleceron Miguel de Cervantes, William Shakespeare e o Inca Garcilaso de la Vega. A data coincide, ademais, co nacemento ou a morte doutros autores prominentes como Maurice Druon, Haldor K. Laxness, Vladimir Nabokov, Josep Pla y Manuel Mejía Vallejo.

Parecía entón unha elección natural que a Conferencia Xeral da UNESCO, celebrada en París en 1995, decidise render unha homenaxe universal aos libros e autores nesta sinalada data, alentando a todos, e en particular aos mozos, a descubrir o pracer da lectura e a valorar as insubstituíbles contribucións daqueles quen impulsou o progreso social e cultural da humanidade. Por este motivo, a UNESCO creou o Día Mundial do Libro e do Dereito de Autor, así como o Premio UNESCO de de literatura infantil e xuvenil en prol da tolerancia.

CELEBRACIÓN DE 2019

Na 24ª edición do Día Mundial do Libro e do Dereito de Autor celebraremos a literatura e a lectura centrándonos principalmente na importancia de mellorar e protexer as linguas indíxenas en liña coa celebración do Ano Internacional das Linguas Indíxenas. Como un vector de coñecemento, os libros reúnen ás persoas ao redor dunha historia e un patrimonio común, á vez que revelan as características das culturas, identidades e idiomas.

SHARJAH, CAPITAL MUNDIAL DO LIBRO 2019

Cada ano, a UNESCO e as tres organizacións profesionais internacionais do mundo do libro (a Unión Internacional de Editores, a Federación Internacional de Libreiros e a Federación Internacional de Asociacións e Institucións Bibliotecarias) elixen unha capital mundial do libro cuxo mandato empeza cada 23 de abril.

O comité de selección elixiu Sharjah, dos Emiratos Árabes Unidos, pola natureza innovadora, integral e inclusiva da súa solicitude, cun programa de actividades centrado na comunidade que contén propostas creativas para involucrar á numerosa poboación migrante. Co slogan "Le: estás en Sharjah", o programa céntrase en seis temas: inclusión, lectura, herdanza, divulgación, publicacións e nenos.

Entre outros actos, haberá unha conferencia sobre a liberdade de expresión, un concurso para novos poetas, talleres para crear libros en braille e libros táctiles, así como moitos outras actividades para a poboación multiétnica de Sharjah. O obxectivo da cidade é fomentar unha cultura da lectura nos Emiratos Árabes Unidos e crear novas iniciativas para fomentar a creación literaria na área e no resto do mundo árabe.

MENSAXE DA Sra. AUDREY AZOULAY, DIRECTORA XERAL DA UNESCO

Os libros son xanelas á nosa vida interior e abren a porta ao respecto mutuo e o entendemento entre os pobos, máis aló das fronteiras e as diferenzas.

Nestes tempos turbulentos, os libros encarnan a diversidade do enxeño humano, dando corpo á riqueza da experiencia humana, verbalizando a procura de sentido e de expresión que todos compartimos e que fai avanzar a todas as sociedades.

Os libros contribúen a unir á humanidade como unha soa familia, compartindo un pasado, unha historia e un patrimonio, para forxar un destino común onde todas as voces sexan escoitadas no gran coro das aspiracións humanas. Os libros son os nosos aliados para difundir a educación, a ciencia, a cultura e a información en todo o mundo.

Os libros constitúen tamén unha forma de expresión cultural que vive a través dunha lingua en particular e forma parte dela. Cada publicación créase nunha lingua específica e está destinada a un público de lectores que fala esa lingua. Por tanto, cada libro escríbese, produce, intercambia, utiliza e valora dentro dun marco lingüístico e cultural determinado.

Este ano destacamos este aspecto importante porque 2019 foi proclamado Ano Internacional das Linguas Indíxenas, liderado pola UNESCO, para reafirmar o compromiso da comunidade internacional de axudar aos pobos indíxenas a preservar as súas culturas, coñecementos e dereitos.

Este mesmo espírito de inclusión e diálogo anima a Sharjah ( Emiratos Árabes Unidos), designada Capital Mundial do Libro 2019. Esta designación será efectiva no Día Mundial do Libro e do Dereito de Autor 2019. Sharjah foi seleccionada en recoñecemento do seu programa "Le: estás en Sharjah", que ten por obxectivo chegar aos grupos marxinados propoñéndolles ofertas creativas co fin de solicitar a participación das poboacións migrantes e de favorecer a inclusión social, a creatividade e o respecto.

Este día brinda a oportunidade de reflexionar xuntos sobre a mellor maneira de difundir a cultura escrita e de permitir que todas as persoas, homes, mulleres e nenos, accedan a ela.

Con Sharjah, os nosos asociados (a Asociación Internacional de Editores, a Federación Internacional de Libreiros e a Federación Internacional de Asociacións de Bibliotecarios e Bibliotecas), e a comunidade internacional no seu conxunto, unámonos para celebrar o libro como encarnación da creatividade e do desexo de compartir ideas e coñecementos e fomentar o entendemento, o diálogo e a tolerancia. Este é a mensaxe da UNESCO con motivo do Día Mundial do Libro e do Dereito de Autor.

Fonte: ONU - https://www.un.org/es/events/bookday/

2 DE ABRIL - DIA INTERNACIONAL DO LIBRO INFANTIL

Hoxe é o DÍA INTERNACIONAL DO LIBRO INFANTIL que se celebra en todo o mundo o 2 de abril de cada ano e que, en España, promove a Organización Española para o Libro Infantil e Xuvenil (OEPLI), sección española do IBBY (International Board on Books for Young People) xunto coas súas catro seccións: Consejo General del Libro Infantil y Juvenil, Consell Catalá del Llibre Infantil i Juvenil (ClijCAT), Asociación Galega do Libro Infantil e Xuvenil (GALIX) e a Asociación de Literatura Infantil e Juvenil Galtzagorri Elkartea.

Dende o ano 1967, o 2 de abril, coincidindo coa data do nacemento do escritor danés Hans Christian Andersen, o IBBY promove a celebración do DÍA INTERNACIONAL DO LIBRO INFANTIL co fin de promover os bos libros infantís e xuvenís e a lectura entre os máis novos.

Cada ano unha Sección Nacional ten a oportunidade de ser a patrocinadora internacional do DIA INTERNACIONAL DO LIBRO INFANTIL e selecciona un/unha escritor/a representativo e un/unha recoñecido/a ilustrador/a do seu país para que elaboren a mensaxe dirixida a todos os nenos e as nenas do mundo e o cartel que se distribúe por todo o mundo, e promóvese a celebración nas bibliotecas, centros escolares, librarias, etc.

Esta ano 2019, o país encargado foi Lituania: a mensaxe e o cartaz son unha creación do escritor e ilustrador Kestutis Kasparavicius.

Se queres descargar o cartaz e o díptico coa mensaxe fai clic nos seguintes enlaces:

• Descarga do cartaz.
• Descarga da mensaxe.

MENSAXE DO DÍA INTERNACIONAL DO LIBRO INFANTIL 2019

Os libros fannos acougar

Vou con présa!, Non teño tempo ningún!, Aburiño!... Expresións coma estas poden escoitarse quizais acotío, non só en Lituania -no centro mesmo de Europa-, senón en moitas partes do mundo. E a miúdo escóitase dicir tamén que vivimos na idade da abundancia da información, da présa e da precipitación.

Non obstante, colles un libro entre as mans e, inmediatamente sentes que algo muda. Parece que os libros teñen unha cualidade marabillosa -axúdannos a acougar. Tan pronto como abres un libro, mergúllaste nas súas tranquilas profundidades e sabes que nel as cousas non pasarán a tanta velocidade que non che permita apreciar nada. Comezas a entender que non paga a pena lanzarse a facer tarefas de dubidosa urxencia. Nun libro todo acontece paseniñamente, en orde e segundo unha secuencia. Quizais porque as súas páxinas están numeradas, quizais porque as súas follas roxen amodo a medida que as vas pasando. Nos libros, os acontecementos do pasado atópanse cos que aínda están por chegar.

O universo dos libros é moi extenso; e nel poden mesturarse a realidade coa imaxinación e a fantasía. Ás veces non sabes moi ben onde -se nun libro ou na vida- percibiches de que xeito tan fermoso caen as pingas do tellado nevado cando se derreten, ou de que forma tan bonita cobre a carriza o valado da veciña. Foi nun libro ou na realidade onde comprobaches que as amoras non só son bonitas senón tamén amargas? Aconteceu nun libro ou na realidade cando estabas estomballada sobre a herba seca no verán, e despois sentada coas pernas cruzadas, vendo como as nubes avanzan polo ceo adiante?

Os libros axúdannos a vivir amodo, apréndennos a observar e convídannos a buscar acomodo e sentar durante un longo anaco. A miúdo lemos sentadas, co libro sobre a mesa ou entre as mans, non si?

E non comprobastes o milagre de que cando estás a ler un libro, o libro tamén te le? Si, si, os libros tamén saben ler. Lenvos a fronte, as cellas, as comisuras da boca que soben e baixan, pero primeiro e por riba de todo, os libros len os ollos. E mirándote aos ollos, eles ven... vaites, xa sabedes o que ven!

Estou seguro de que os libros nunca están aburridos se están entre as túas mans. Unha persoa que goce lendo -sexa pequena ou adulta- é moito máis interesante que unha persoa á que non lle preocupen os libros, que sempre estea bulindo a contrarreloxo, que non teña tempo para sentar, que non teña tempo para fixarse en nada do seu arredor.

No Día Internacional do Libro Infantil, este é o meu desexo para todas nós:

Que non falten libros interesantes para o lectorado e lectorado interesante para os libros!

Escrito por Kęstutis Kasparavičius

Ilustrado por Kęstutis Kasparavičius

Traducido por Antía Marante Arias (GÁLIX)

Outro ano máis BIBLIOPAZOS súmase con esta noticia no blog aos actos para conmemorar este día e animámosvos a ler e difundir esta Mensaxe do DIA INTERNACIONAL DO LIBRO INFANTIL e a gozar da lectura de calquera libro que teñades a man, na casa, no colexio ou onde vos atopedes. Tamén podedes pasar pola Biblioteca onde poderedes escoller entre miles de libros que temos a vosa disposición para que poidades levalos para ler ás vosas casas ou para facelo aquí directamente.