Ola de
novo seguidoras/es, usuarias/os e socias/os da Biblioteca Pública Municipal do Concello
de Pazos de Borbén "BIBLIOPAZOS".
Iniciamos
a programación das actividades de outono-inverno con novas actividades para as
vindeiras semanas a través do programa de "OBRADOIROS DE CREACIÓN LITERARIA E CERTAME DE RELATO
CURTO" do Programa de actividades de dinamización da
lingua galega do ano 2026 que conta co patrocinio do Servizo
de Normalización Lingüística e Servizos Lingüísticos da Deputación Provincial
de Pontevedra.
Os principais
obxectivos deste programa son os de promover e dinamizar o uso da
lingua galega no municipio, sobre todo entre a poboación infantil, a
mocidade e as persoas con diversidade funcional; animando á creación
literaria e á lectura a través da realización de diversos obradoiros e da
convocatoria dunha nova edición dun certame literario en lingua galega; ademais
tamén se pretende promover e facilitar a plena integración na sociedade
dos colectivos en risco de exclusión social e con diversidade funcional, a
través do emprego da expresión artística e literaria en lingua galega.
Poderá participar todo o alumnado de Educación Infantil,
Primaria e Secundaria residente no municipio que estivera ou estea cursando
estudos de Infantil, Primaria ou Secundaria nos colexios públicos do concello
durante os cursos 2025/2026 e/ou 2026/2027; e tamén os usuarios dos Centros de
Atención a Persoas con Diversidade Funcional que teñan a súa sede e actividade
en Pazos de Borbén.
A
primeira actividade iniciarase o próximo venres 24 de setembro co Obradoiro de Creación
Literaria "CONTOS
NO PAÍS DA CHOIVA" que
será impartido polo escritor, poeta, docente e contacontos MIGUEL ALONSO DIZ e nel participará todo o alumnado de
Infantil e Primaria do CPI "Curros Enríquez" de Pazos; o alumnado de
Educación Infantil da EEI "A Galeriña" de Nespereira; e os usuarios
da Asociación ASPAVI.
Realizarase
nas instalacións escolares e da Asociación ASPAVI en 9 sesións de entre 50
e 90 minutos cada unha delas nos seguintes días e horarios:
Xoves, 24 de Setembro:
13:00 a 14:30 3º de
Primaria CPI Pazos
Venres, 25 de Setembro:
13:00 a 14:30 5º
de Primaria CPI Pazos
Xoves, 1 de Outubro:
13.00 a 14:15 1º de
Primaria CPI Pazos
Venres, 2 de Outubro:
13:00 a 14:30 6º de
Primaria CPI Pazos
Xoves, 8 de Outubro:
13:00 a 13:50 Infantil CPI
Pazos
Venres, 9 de Outubro:
13:00 a 14:30 4º Primaria
CPI Pazos
Xoves, 15 de Outubro:
13:00 a 13:50 Infantil EEI
A Galeriña
15:30 a 17:00 Asociación ASPAVI
Venres, 16 de Outubro:
13:00
a 14:15 2º Primaria CPI Pazos
Nesta novo Obradoiro
de Creación Literaria ensinarase ao alumnado participante os procesos de
creación. Camiñando pola palabra, tanto escrita como oral, a imaxe e mesmo a
expresión teatral para dotar dunha visión o máis completa posible; sempre
adaptándose ao nivel da rapazada participante e dando resposta ás necesidades
de cada grupo e de cada persoa.
Nas
actividades buscarase fomentar a creatividade, o amor pola arte en xeral e pola
nosa lingua.
Todas
estas variables xogan un papel relevante no intre de pórse diante da folla en
branco.
Dende
os ciclos de infantil ata 6º de primaria, pasando polas usuarios dos colectivos
de persoas con diversidade funcional, pretendemos achegar a un colectivo
de persoas máis amplo o labor desenvolto a través de obradoiros adaptados a
cada idade e circunstancia.
Os obxectivos que se pretende
conseguir son os seguintes:
- Incentivar a creatividade e o valor da orixinalidade.
- Estimular a creación de historias vencelladas co noso entorno, sementando neles o aprecio e valoración do propio, tanto na súa vertente material (patrimonio histórico), como inmaterial.
- Asociar a escrita ao xogo, e non só a escrita, senón tamén o propio proceso de aprendizaxe.
- Enlazar elementos escritos e de narración visual e conectar a escrita e a narración oral. Incentivar a transmisión oral de historias no seu entorno familiar.
- Incentivar a lectura como motor da escrita. Iniciar no xogo de palabras.
- Escribir como ferramenta de expresión dun mesmo.
- Fomentar o uso da lingua galega.
- O emprego da expresión artística galega como un elemento de expresión integradora na sociedade e de fomento do respecto á diversidade.
Os obradoiros están estruturados
en cinco niveis:
- Primeiro nivel:
Ciclo de Infantil (50’)
·
Contos
no país da choiva.
·
Narrar
a través da imaxe.
- Segundo nivel: 1º e
2º de Primaria (75’)
·
Os
soños de Esther e de Emma.
·
Son
o/a protagonista?
·
A
nosa propia historia. Debuxamos.
- Terceiro nivel: 3º
e 4º de Primaria (90’)
·
Traballo
en grupo. (Escrita, debuxo e teatro).
·
Imaxínate
que un día ao saír da casa...
- Cuarto nivel: 5º e
6º de Primaria (90’)
·
Traballo
en grupo. (Escrita, banda deseñada, teatro...).
·
Imaxínate
que un día ao saír de casa...
-Quinto nivel:
Colectivos de persoas con diversidade funcional
·
Unha
sesión de contos.
·
Continuamos
a historia.
MIGUEL
ALONSO DIZ
é escritor, poeta, docente, contacontos, presentador, divulgador cultural e,
sobre todo, persoa.
É membro da Asociación de Escritores
en Lingua Galega (AELG). Participou en diferentes iniciativas culturais e
recitais en Galicia e Portugal, amais de nos principais festivais de poesía de
Galicia.
Traducidos os seus libros ao castelán,
e editados, por decisión do autor, para fóra de Galicia, están presentes en
colexios e bibliotecas de México, Puerto Rico e en diversas comunidades da
xeografía española.
Colaborador habitual dos Servizos de
Normalización e Dinamización Lingüística realiza diversas actividades creativas
(conta contos, obradoiros) nos centros educativos e bibliotecas, nos que achega
á rapazada e adultos o mundo da literatura e a creación.
Dende o ano 2022 é editor de poesía na
Editorial Antela.
Obra coa ilustradora LUZ BELOSO:
- O cullarapo Croque (2012)
- A nena á que non deixaban ser feliz (2013). Libro seleccionado polo SEP (Servicio de Educación Pública) de México entre máis de 10.000 títulos de España e latino América, para a súa incorporación ás bibliotecas de aula dos centros de ensinanza pública de todo o país.
- O soño de Esther (2014) 3º mellor libro no apartado de literatura infantil segundo Fervenzas literarias. Finalista dos premios ISAAC DÍAZ PARDO mellor libro ilustrado 2014 e NEIRA VILAS mellor libro infantil xuvenil 2014.
- O valente coello que quixo soñar (2015) Finalista do Premio Frei Martín Sarmiento 2016.
Os catro
títulos mencionados foron elixidos para formar parte de programas educativos do
goberno de Puerto Rico.
- MEL, unha mosca agradecida (2016)
libro CD. Premio booktrailer realizado por Luz Beloso. “Mel, unha mosca
agradecida” no Festival de Cans.
- Piratas no recreo (2018) Belagua edicións. En
colaboración con ARELAS (Asoc. de familias de menores trans)
- Unha folla vermella (2020),
álbum ilustrado para adultos.
- Instrucións para ler este libro (2022)
Xerais.
- O soño de Emma (2024) Edicións Embora.
- De príncipes, princesas e outras andrómenas (2025)
Xerais.
Obra con outros ilustradores:
- "Música no faiado" (2018) Xerais e ilustrado por Laura Tova. Finalista na Gala do Libro Galego 2019.
- “O xigante de Allariz” (2021) Antela Editorial. Escrito con Xabier Domínguez e ilustrado por Tania Martíns.
- “O país da choiva” (2021) Antela Editorial e ilustrado por Xosé Tomás. Libro apoiado pola Deputación de Ourense e pola Secretaría Xeral de Política Lingüística da Xunta de Galicia.
Enlace a wikipedia: https://gl.wikipedia.org/wiki/Miguel_%C3%81ngel_Alonso_Diz
Recoñecementos:
- Segundo premio do Certame de relatos Ciencia que conta no 2010.
- Premio do I Certame de micro-relatos OZOCOgz no 2013.
- Premio Olloboi Orixinal no 2014, por A muller lamprea IV.
- Premio no Festival Internacional de Curtas de Bueu por Cabelos de Batalla, feito no obradoiro de plástica do IES As Barxas.
- Premio "Paraugas" 2017 do Cluster de Comunicación de Galicia ao libro infantil do ano con "Manual del Bullying", editado por Nova Galicia.
-----------------------------------------------------------------------------------------------------------------------------
O segundo
obradoiro "OS XOGOS DA ESCRITA. COMO MOVER AS PEZAS DOS RELATOS” será impartido pola escritora, xornalista e
docente ANDREA
BARREIRA FREIJE para todo o alumnado de ESO do CPI “Curros Enríquez” de Pazos. Terá
lugar tamén nas instalacións do colexio en catro sesións dunha duración de
hora e media cada unha e se realizarán nas seguintes datas e horarios:
Mércores, 7 de
outubro
09:30 a 11:10 - 1º ESO
12:20 a 14:00 - 2º ESO
Xoves,
8 de outubro
09:30 a 11:10 - 4º ESO
12:20 a 14:00 - 3º ESO
Es quen de escribir
un relato nunha hora e media? Atréveste a enfrontarte á folla en branco? Este é un obradoiro
de narrativa onde se aprende a usar as ferramentas básicas para escribir un
relato. A través do xogo, quen participe descubrirá que hai detrás do
principio, nó e desenlace.
Escribir é coma xogar.
Primeiro precisas coñecer as normas, as pautas básicas de como se desenvolve a
escrita, as técnicas, as estratexias, os elementos narrativos… Despois, toca
pulir e practicar unha e outra vez ata conseguir que a nosa historia (o noso
xogo) sexa o máis atractiva posible.
Nos obradoiros de narrativa
detémonos a reflexionar sobre o punto de vista desde o que contar a historia (o
narrador), sobre como construír personaxes sólidas, cribles e coas que
sentirnos identificadas, detémonos nos espazos onde transcorre a acción e
xogamos cos tempos coma se tiveramos as horas e os días nas nosas mans. Todo
isto, tecido nunha trama, onde cada xiro nos leva a un final distinto.
“Os xogos da escrita. Como
mover as pezas dos relatos” é un obradoiro de narrativa adaptado a cada
curso ao que vai dirixido e que na presente edición contará coa colaboración do
profesorado. Por unha banda, a partir das bases do VIII Certame de Relato Curto Pazos de Borbén, abordaremos a
construción dunha historia na que serán fundamentais os intereses de cada
participante, tanto para facilitar a escrita, como para lograr un texto co que
se sintan identificados e orgullosos. Por outra, subliñaremos a importancia da
imaxinación e creatividade propia a fin de comprender que o ser humano pode
chegar máis lonxe que a IA.
A partir das ideas que vaian
xurdindo estruturaremos a narración para facela interesante, atractiva e dinámica.
Veremos como mudan as historias en función das personaxes e voces narradoras
escollidas. Tiraremos do fío para que o relato flúa de xeito natural, usando
cada elemento narrativo ao favor da historia.
Ao remate da sesión, leremos os
fragmentos desenvoltos para, dun xeito construtivo, analizar entre toda a aula
o texto. Unha visión allea ao texto sempre axuda a mellorar as creacións e
enriquecer o proceso. Cómpre salientar, que durante o obradoiro a rapazada ten
o “comodín do público” co que poden pedir axuda a compañeiros e compañeiras.
Malia que o proceso sexa individual, contar co apoio da aula, sempre é un bo
xeito de evitar bloqueos creativos e ter varias opcións que axuden a avanzar e
facer o proxecto o máis interesante e próximo para quen le.
A actividade non terminará na
sesión do obradoiro. Seguindo a cronoloxía de escrita dunha autora,
conformaranse grupos de 3 ou 5 persoas (en función do número de alumnos de cada
aula) que servirán coma lectores beta, por último, contarase coa colaboración do
profesorado para a fase de revisión final, coma se este cumprise a función de
edición. Así verán o proceso completo, desde a escrita inicial á final.
O presente obradoiro impartirase
para a rapazada de 1º a 4º da ESO. Cada persoa escribirá un relato, no
que se mesturarán as temáticas do VIII
Certame de Relato Curto de Pazos de Borbén, coas ferramentas máis básicas
da creación narrativa e aquelas que lles permitan arriscar nas voces narradoras
ou nos xiros das historias
1º ESO: A través dun xogo, a rapazada aprenderá que é un
narrador, como se constrúen as personaxes, como inflúe o espazo na historia que
contamos, como o tempo determina a acción. Todo isto ordenarase nunha trama
lineal na que a narración resultante será divertida, distendida e extravagante.
2º ESO: Despois da base creada o curso anterior, descubrirán
como usar as ferramentas narrativas para levar ao seu terreo as bases do
concurso municipal. Isto permitirá descubrir unha variedade máis ampla dentro
dos elementos narrativos.
3º ESO: A partir da tradición oral, a rapazada aprenderá a
adaptar as historias acontecidas no pasado, ao presente. Deste xeito,
recupérase, revísase e actualízase a aprendizaxe e a memoria colectiva cunha
ollada do presente.
4º ESO: Neste curso profundaremos en como podemos xogar coas
estruturas (inversa e circular principalmente, aínda que tamén in media res) e
variar principios e finais, para poder experimentar cos xiros e descubrir
outras formas de contar.
ANDREA
BARREIRA FREIJE forma parte actualmente de 7H
Cooperativa cultural, onde se dedican á xestión cultural e á educación
vinculada á creatividade, desde as artes e cunha perspectiva social.
Ten
realizados talleres de narrativa para adolescentes e adultos en Taller Abierto_Gestión Cultural (Pontevedra);
sobre igualdade para crianzas, rapazada e adultos da man de Lilith Acción Social e Educativa; sobre
temática medioambiental coa empresa Molotov;
talleres de escrita para distintas idades en bibliotecas como a de Castrillón, Fórum Metropolitano (A Coruña), O
Saviñao (Lugo), Ánxel Casal (Santiago de Compostela), Irixoa (A Coruña)...
por mencionar só algunhas, en escolas, institutos e Feiras do Libro.
Colabora
mensualmente na sección de cultura do Nós Diario cun artigo en
profundidade. En xullo de 2021, publicou un relato no suplemento “Máis”
do mesmo xornal e durante o mes de agosto de 2020 unha serie de microrrelatos.
Forma
parte do colectivo feminista de crítica literaria A Sega, onde realiza recensións de libros e colabora na
organización de eventos, talleres e comunicación.
En 2023
foi premiada
co Agustín Fernández Paz de Narrativa Infantil e Xuvenil pola Igualdade,
co libro Quen precisa unha avoa?,
publicado por Xerais en 2024.
En 2021
publicou a biografía para público infantil Desmontando
o corpo, construíndo a ciencia. As xemelgas Fernández de la Vega, en
Baía Edicións.
En 2018,
a novela Palabra de Bruxa, na
colección Costa Oeste da Editorial Galaxia.
En 2015,
a novela xuvenil de xénero fantástico, Non
hai luz sen escuridade, baixo o selo de Urco Editora.
Participou
nas antoloxías colectivas O libro dos
libros (Editorial Galaxia), Contos
do Sacaúntos. Romasanta o criminal (Urco Editora), Lendas de Gallaecia, Segunda Era e Encontros
na Terceira Fase de Contos Estraños, Tebras na Alma (autoedición),
e Contos de Verán (Redelibros).
Escribiu
o conto infantil de Nadal, Que pode
saír mal? para as actividades Pontexogos (Pontevedra) do Nadal
2016/17. Colaborou en Ilusionaria IV,
antoloxía solidaria de contos para crianzas e escribiu historias infantís na
web de promoción da lectura Boolino.
----------------------------------------------------------------------------------------------------------------------------
E nos próximos días publicaremos a convocatoria do “VIII CERTAME DE RELATO CURTO DE PAZOS DE BORBÉN" no que, como en anos anteriores, haberá 7 categorías para poder participar:
- Categoría A: Persoas con diversidade funcional
- Categoría B: Alumnado de Educación Infantil
- Categoría C: Alumnado de 1º e 2º de Primaria
- Categoría D: Alumnado de 3º e 4º de Primaria
- Categoría E: Alumnado de 5º e 6º de Primaria
- Categoría F: Alumnado de 1º e 2º de ESO
- Categoría G: Alumnado de 3º e 4º de ESO
O PRAZO DE PRESENTACIÓN dos traballos abrirase
do 28 de setembro ao 13 de Novembro de 2026.
Desde BIBLIOPAZOS animamos
a todo o profesorado, aos pais, nais e demais familiares do alumnado para que
os estimulen a escribir e a participar neste nova convocatoria do certame que
chega a súa 8ª edición.
Para
calquera información sobre a programación podedes contactar coa Biblioteca por
teléfono chamando ao número 986497273 ou por
correo electrónico a biblioteca@pazosdeborben.gal no noso horario
habitual de apertura.
EN
BIBLIOPAZOS SEGUIMOS TRABALLANDO POLA EDUCACIÓN E A CULTURA
