CAMBIO DE HORA: ADIÁNTASE O HORARIO DA ACTUACIÓN DE CELSO F. SANMARTIN e FERNANDO PALITOS - FESTIVAL ATLÁNTICA 2026 ÁS 19.30 HORAS NO AUDITORIO DO CONCELLO

Ola seguidoras/es e usuarias/os da Biblioteca Pública Municipal de Pazos de Borbén - BiblioPazos.

COMUNICÁMOS

o CAMBIO DE HORA

deste evento.

ADIÁNTASE ÁS 19:30 HORAS en vez de ás 21:00 horas como estaba previsto.

Continuamos con outra actividade neste mes de xullo coa que finalizamos a participación do Concello de Pazos de Borbén no FESTIVAL INTERNACIONAL DE NARRACIÓN ORAL "ATLÁNTICA" Festival Atlántica, por oitavo ano consecutivo, neste importantísimo festival tanto a nivel autonómico como nacional, que no 2026 celebra a súa XIV edición.

Nesta ocasión visitaranos o colleitador e contador de contos e historias de vida de tradición oral e poeta galego CELSO F. SANMARTIN co seu espectáculo de narración oral para público adulto “CONTAR”, o próximo Venres 10 de Xullo a partir das 19:30 horas no Auditorio do Concello.

Ademais nesta actuación CELSO F. SANMARTIN daralle á alternativa a Fernando Palitos que forma parte xunto con outros participantes do CICLO NOVAS VOCES que o Festival Atlántica quere consolidar este ano e que supón unha aposta pola creación contemporánea e polo diálogo entre xeracións que permitirá compartir escenario a artistas de traxectoria recoñecida e a novas creadoras e creadores procedentes de diferentes territorios, grazas á colaboración con outros festivais como AHOZ AHO de Guipúzcoa, o Festival de Zamora e coa Escola Superior de Arte Dramática de Galicia. A presenza destes participantes no ciclo reforza a vontade de Atlántica de abrir espazos profesionais para o encontro, a experimentación e a incorporación de novos relatos, novas linguaxes e novas maneiras de habitar a palabra escénica.

"CONTAR”: Di Celso que Contar é un oficio que todos temos.

“Levo recollendo contos e historias inconscientemente toda a vida, coma calquera. Pero desde hai anos véñoas recollendo e reacomodándomas, coa intención de contalas de cara a distintos públicos.

Escoitar, conversar, colleitar, destilar, contar, convivir, …

Empecei por casualidade e oportunidade. Continúo porque é unha actividade de amor, sentido e paixón: pola lingua, pola oralidade, pola comunicación, por pensar que non se perda un verdadeiro tesouro de historias e contos, e ir por aí mostrándoo e ofrecéndoo coa boca aberta e coa boca chea, falando ademais bencísimo del, que é coma falar dunha das nosas posibilidades de relación e cultura máis ricas e admirables.

O meu fardo ou repertorio está composto basicamente por contos, historias e memorias ligadas á tradición oral galega e tamén á europea, na que temos arte e parte, asentadas na cultura agrícola-gandeira e pedestre. E cun toque contemporáneo, para apalparlles que tamén son actuais, que aquí as están e non coma pezas de museo. Tamén reinvento historias e contos, coma calquera...

Ás nenas e nenos, e á xente grande, intento contarlles ademais, que o que se conta non é unha cifra exacta-exacta, e que a lingua non se pode deixar que se poña de trapo, nen o corazón de pedra.”

Convidamos a toda a veciñanza a achegarse ao Auditorio do Concello para participar neste evento.

Tedes mais información sobre esta actividade e os artistas parcipantes facendo clic no seguinte enlace:

https://bibliopazos.blogspot.com/.../finalizamos...

Para calquera información sobre esta programación poden contactar coa Biblioteca chamando por teléfono chamando ao número 986497273 ou por correo electrónico a biblioteca@pazosdeborben.gal no noso horario habitual de apertura.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

Finalizamos a participación do Concello de Pazos de Borbén na XIV Edición do FESTIVAL INTERNACIONAL DE NARRACIÓN ORAL “ATLÁNTICA”, coa actuación de CELSO F. SANMARTÍN co espectáculo "CONTAR” e acompañado de FERNANDO PALITOS participante do Ciclo Novas Voces

Continuamos con outra actividade no mes de xullo coa que finalizamos a participación do Concello de Pazos de Borbén no FESTIVAL INTERNACIONAL DE NARRACIÓN ORAL "ATLÁNTICA", por oitavo (8) ano consecutivo, neste importantísimo festival tanto a nivel autonómico como nacional, que no 2026 celebra a súa XIV edición.

Nesta ocasión visitaranos o colleitador e contador de contos e historias de vida de tradición oral e poeta galego CELSO F. SANMARTIN co seu espectáculo de narración oral para público adulto “CONTAR”, o próximo Venres 10 de Xullo a partir das 21:00 horas no Auditorio do Concello.

Ademais nesta actuación CELSO F. SANMARTIN daralle á alternativa a FERNANDO PALITOS que forma parte xunto con outros participantes do CICLO NOVAS VOCES que o Festival ATLÁNTICA quere consolidar este ano e que supón unha aposta pola creación contemporánea e polo diálogo entre xeracións que permitirá compartir escenario a artistas de traxectoria recoñecida e a novas creadoras e creadores procedentes de diferentes territorios, grazas á colaboración con outros festivais como AHOZ AHO de Guipúzcoa, o Festival de Zamora e coa Escola Superior de Arte Dramática de Galicia. A presenza destes participantes no ciclo reforza a vontade de Atlántica de abrir espazos profesionais para o encontro, a experimentación e a incorporación de novos relatos, novas linguaxes e novas maneiras de habitar a palabra escénica.

"CONTAR”

Di Celso que Contar é un oficio que todos temos.

“Levo recollendo contos e historias inconscientemente toda a vida, coma calquera. Pero desde hai anos véñoas recollendo e reacomodándomas, coa intención de  contalas de cara a distintos públicos.

Escoitar, conversar, colleitar, destilar, contar, convivir, …

Empecei por casualidade e oportunidade. Continúo porque é unha actividade de amor, sentido e paixón: pola lingua, pola oralidade, pola comunicación, por pensar que non se perda un verdadeiro tesouro de historias e contos, e ir por aí mostrándoo e ofrecéndoo coa boca aberta e coa boca chea, falando ademais bencísimo del, que é coma falar dunha das nosas posibilidades de relación e cultura máis ricas e admirables.

O meu fardo ou repertorio está composto basicamente por contos, historias e memorias ligadas á tradición oral galega e tamén á europea, na que temos arte e parte, asentadas na cultura agrícola-gandeira e pedestre. E cun toque contemporáneo, para apalparlles que tamén son actuais, que aquí as están e non coma pezas de museo. Tamén reinvento historias e contos, coma calquera...

Ás nenas e nenos, e á xente grande, intento contarlles ademais, que o que se conta non é unha cifra exacta-exacta, e que a lingua non se pode deixar que se poña de trapo, nen o corazón de pedra.”

Convidamos a toda a veciñanza a achegarse ao Auditorio do Concello para participar neste evento.

CELSO FERNÁNDEZ SANMARTÍN (Galicia)

É unha desas persoas que parecen feitas da mesma materia que os contos. Nado en Lalín en 1969, no barrio da Cacharela, leva décadas convertendo a memoria, a fala popular e as pequenas historias da vida nunha forma única de arte oral.

Licenciado en Filosofía pola Universidade de Santiago de Compostela, poeta, contador e impulsor de iniciativas culturais como FoCuCu (Foro de Cultivos Culturais), Celso é hoxe unha das voces imprescindibles da narración oral galega contemporánea.

O seu universo nace das conversas escoitadas ás persoas maiores, das aldeas, das cociñas, dos velorios, das feiras e dos silencios cheos de sentido. Recolle historias coma quen recolle sementes e logo fainas medrar diante do público cun estilo absolutamente persoal: delicado, divertido, profundamente humano e atravesado por unha musicalidade que converte cada palabra nun acontecemento.

Nos seus espectáculos conviven a retranca, a poesía, a memoria e unha maneira de mirar o mundo chea de tenrura e intelixencia. Celso non conta só historias: crea un lugar ao que entrar. Un espazo íntimo onde a oralidade recupera toda a súa forza e onde cada persoa sente que alguén lle está falando directamente ao corazón.

Autor de libros como A cama de meu avó Manuel, A cousa eterna, Poesía hexágono, entre outros, a súa escrita comparte coa súa oralidade esa capacidade rara de atopar beleza no aparentemente pequeno e o extraordinario no cotián.

No Festival Atlántica, escoitar a Celso Fernández Sanmartín é volver por un intre ao lugar onde nacen os contos.

FERNANDO PALITOS presenta por primeira vez a versión orixinal dalgunhas historias que Celso deformou coa súa óptica. Fernando. Fernando ve o mundo doutra maneira, porque susurra aos cabalos, apréndeos a bailar, sabe de calefaccións e ensina aos fillos a facer mapas do mundo. As catrocousas que necesita alguén para contar historias: altura de miras, calor, ver mundo e saber o camiño de volta.

Un ano máis formamos parte de Atlántica

Para calquera información sobre esta programación poden contactar coa Biblioteca chamando por teléfono chamando ao número 986497273 ou por correo electrónico a biblioteca@pazosdeborben.gal no noso horario habitual de apertura.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

"NO PAÍS DAS COUSAS MARABILLOSAS" con RAFA QUINTÍA, unha actividade da XIV Edición do FESTIVAL INTERNACIONAL DE NARRACIÓN ORAL "ATLÁNTICA" para coñecer a tradición e a cultura popular galega

Iniciamos as actividades do mes de xullo cunha actividade titulada “NO PAÍS DAS COUSAS MARABILLOSAS” que será impartida polo antropólogo RAFA QUINTÍA nun espazo natural marabilloso como é o Carballo de Martiz na Senda Arqueolóxica de Amoedo o Sábado 4 de Xullo ás 20:00 horas, e convidamos a toda a veciñanza a asistir á mesma. A entrada é de balde.

Esperámosvos ás 20:00 horas no punto de encontro (Torreiro de Amoedo) sinalización P1 do mapa, onde hai aparcamento público xeral e camiñaremos 1,2 km (20 minutos aprox.) para achegarnos ao Carballo de Martiz onde se desenrolará a actividade.

Para persoas con mobilidade reducida hai prazas limitadas de aparcamento preto do Carballo de Martiz, sinalización P2 indicada no mapa.

Esta actividade está incluída na XIV edición do FESTIVAL INTERNACIONAL DE NARRACIÓN ORAL "ATLÁNTICA" que se celebra neste ano 2026 e no que o Concello de Pazos de Borbén participa por oitavo ano consecutivo.

"NO PAÍS DAS COUSAS MARABILLOSAS” o antropólogo Rafa Quintía convídanos a descubrir o fascinante mundo dos amuletos galegos nunha sesión moi especial onde se mesturan maxia, menciña popular e narración oral. Esta conferencia que fala do mundo dos amuletos na cultura popular galega, non é unha charla ao uso: é unha viaxe chea de contos, lendas e saber tradicional.

Acompañarémolo nunha sesión onde cada historia nos conecta co coñecemento ancestral herdado dos nosos devanceiros. Rafa ten o don de facer que escoitar sexa lembrar: rescata o que fomos e fainos rebuscar nas nosas memorias, cun estilo ameno, próximo e apaixonado.

Un encontro para gozar, sorprendernos e recoñecer a forza da tradición que aínda vive en nós.

RAFA QUINTÍA (Galicia)

Rafa Quintía é unha das voces máis singulares da antropoloxía galega contemporánea. Cunha mirada lúcida e fondamente comprometida coa cultura do país, leva anos explorando e narrando o imaxinario galego dende múltiples frontes: a investigación, a divulgación, a docencia e a creación audiovisual.

Nado en Vigo en 1971, é licenciado en Antropoloxía Social e Cultural e en Ciencias Económicas, e conta cun mestrado en Educación Secundaria. Dirixe a empresa Ab Origine, especializada na posta en valor do patrimonio inmaterial, e exerce como profesor na UNED.

A súa obra escrita abrangue máis de trinta libros nos que mergulla na mitoloxía, o simbolismo, a relixión popular e as crenzas tradicionais galegas. Entre os seus títulos máis destacados están Mitoloxía de Galicia, Heichas contar. Contribución ao corpus mitolóxico galego, Mariña inmaterial, Pola graza de Deus. A relixiosidade popular en Galicia ou Descifrando o Entroido. Nos últimos anos publicou tamén Dicionario dos amuletos galegos, A etnomediciña galega e A pedra da pezoña, obras que continúan afondando nas crenzas, símbolos e saberes da cultura popular galega.

Ademais, participa activamente en proxectos de divulgación e defensa do patrimonio cultural galego, é presidente da Sociedade Antropolóxica Galega (SAGA). Tamén é autor de documentais que exploran rituais, festas e paisaxes culturais de Galicia, combinando sensibilidade estética e rigor académico.

Premiado en diversas ocasións —entre outros, co Ramón Piñeiro de Ensaio ou o Vicente Risco de Ciencias Sociais—, exerce como presidente da Sociedade Antropolóxica Galega e destaca como un dinamizador activo do coñecemento popular e do patrimonio invisible.

O ano pasado deixou pegada en Santo André de Teixido, nun encontro que foi un auténtico éxito e onde o público quedou atrapado entre historias de mortos, romarías, crenzas e camiños antigos. Por iso regresa este ano ao Festival Atlántica, desta volta baixo un carballo cheo de historias, nun deses lugares onde semella que a memoria segue falando baixiño entre as follas.

A súa participación no Festival Atlántica é unha oportunidade única para escoitar como a tradición cobra nova vida cando se conta dende o respecto, a paixón e o coñecemento profundo.

Un ano máis formamos parte de Atlántica

Para calquera información sobre esta programación poden contactar coa Biblioteca chamando por teléfono chamando ao número 986497273 ou por correo electrónico a biblioteca@pazosdeborben.gal no noso horario habitual de apertura.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

"A NENA E OS TRES OSOS" de BEA CAMPOS en Pazos de Borbén. Unha actividade de ATLÁNTICA MIÚDO da XIV Edición do FESTIVAL INTERNACIONAL DE NARRACIÓN ORAL "ATLÁNTICA"

Continuamos coas actividades do mes de xuño co espectáculo "A NENA E OS TRES OSOS" que nos trae a actriz, narradora oral e comunicadora BEA CAMPOS.

Con este espectáculo o Concello de Pazos de Borbén participa por oitavo ano no FESTIVAL INTERNACIONAL DE NARRACIÓN ORAL "ATLÁNTICA" que celebra a súa XIV Edición no 2026.

O espectáculo terá lugar o Venres 12 de Xuño, a partir das 13:00 horas no Auditorio do Concello de Pazos de Borbén e están convidados a asistir ao mesmo todo o alumnado de 1º a 4º de Primaria do CPI “Curros Enríquez” de Pazos; e todas aquelas veciñas e veciños que se inscriban previamente na Biblioteca chamando ao teléfono 986 497 273. A entrada é de balde ata completar o aforo do local.

"A NENA E OS TRES OSOS" é unha proposta escénica tenra, divertida e chea de imaxinación para público infantil e familiar. Un espectáculo con monicreques, música e obxectos que revisita un dos grandes clásicos da literatura infantil cunha posta en escena delicada e moi visual.

Nesta historia, as cousas máis sinxelas poden transformarse noutra cousa completamente distinta: unha maleta convértese nunha casa, un caldeiro nunha cadeira e unha manchea de calcetíns nunha entrañable familia de osos.

O oso grande, o oso mediano e o oso pequeno viven felices no bosque. Cada mañá repiten o mesmo ritual: preparan as papas do almorzo e saen pasear cantando e xogando mentres arrefrían. Mais un día, unha pequena visitante inesperada entra na súa casa e muda todo…

Con humor, cancións e moita creatividade, “A nena e os tres osos” convida ás crianzas a entrar nun universo onde o xogo e a fantasía transforman o cotián en aventura.

BEA CAMPOS leva media vida habitando escenarios, libros e historias. Actriz, narradora oral e comunicadora, é desas persoas capaces de converter unha palabra nun lugar ao que entrar e quedar un intre.

Licenciada en Arte Dramática pola ESAD de Galicia, comezou moi nova no mundo da narración oral e, dende entón, levou os seus contos por milleiros de funcións e festivais, tamén ao outro lado do Atlántico, participando en encontros de artes escénicas en Latinoamérica.

Forma parte de compañías fundamentais da escena galega como Migallas Teatro e Inventi Teatro, ademais de colaborar como actriz noutras propostas escénicas e audiovisuais. Mais se hai algo que define o seu traballo é a capacidade de crear unha conexión inmediata co público, sexa nun teatro, nunha biblioteca, nun patio escolar ou diante dunha cámara.

Formadora no ámbito da expresión dramática, da narración oral e da literatura infantil, Bea leva anos sementando historias tamén nas novas xeracións. Actualmente presenta Kalandraka TV, un espazo desde o que achega o mundo dos libros e da literatura infantil a pequenos e maiores cunha naturalidade luminosa e contaxiosa.

No FESTIVAL ATLÁNTICA, BEA CAMPOS é sempre garantía de emoción, humor, ritmo e desa calor especial que teñen as grandes contadoras cando fan sentir ao público que cada historia foi contada só para el.

Un ano máis formamos parte de Atlántica

Para calquera información sobre esta programación poden contactar coa Biblioteca chamando por teléfono chamando ao número 986497273 ou por correo electrónico a biblioteca@pazosdeborben.gal no noso horario habitual de apertura.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

"CONTOS PARA CONTAR CARTOS" con AVELINO GONZÁLEZ na III FESTA DOS NOSOS MAIORES en Pazos de Borbén

 

Ola seguidores da Biblioteca Pública Municipal de Pazos de Borbén - BiblioPazos.

Informámosvos que o vindeiro Sábado 23 de Maio de 2026, ás 17:00 horas, na Praza do Concello teremos con nós ao actor, contador e monologuista AVELINO GONZÁLEZ co seu espectáculo "CONTOS PARA CONTAR CARTOS" que ofrecerá a súa actuación na III FESTA DOS NOSOS MAIORES cun feixe de contos e historias que garantirán moitas risas e diversión para os asistentes a este evento.

"Os cartos andan nas mans de todo o mundo (máis ou menos!), témolos todo o mundo na cabeza (tamén máis ou menos) peeero… case non os tocamos!

Hai quen di que, en realidade, non existen.

Hai quen di que os cartos só deberan estar na man de quen sabe usalos, debera estar avisados os seus efectos, como se fai no tabaco, e debera recomendarse lavar as mans sempre despois de tocalos.

Os contos que falan dos cartos, en realidade falan de como somos e de que nos importa. E da cantidade de estupideces que chegamos a facer por eles!

Se cadra estes contos axudan a botar contas.

Son contos que contan cartos: Canto nos importan, canto os gardamos, canta falta fan, e canto os queremos.

A economía é: Tes ou non tes. Os problemas económicos son: cantos queres ter.

E a solución está en: Ah, carallo! Quen a soubera!"

Sempre cun ollo posto no local, na tradición e na actualidade, Avelino González intenta incorporar historias do sitio onde fai as actuacións.

As historias conviven con nós. A tradición é unha peneira que non deixa de peneirar, neste caso contos.

E os que chegaron aos nosos días, chegaron porque son bos, porque teñen sentido, e porque cumpren ca función para o que foron creados pola xente, descoñecida pero con nome, que os creou e os contou. Para rir e facer rir.

Xosé Avelino González Fernández, coñecido como AVELINO GONZÁLEZ (Comesaña, Vigo, Pontevedra, Galicia, España; 1962) é un actor, contador, monologuista, tradutor, director de teatro é... o que faga falta.

Disto de actuar gústalle todo, ata picar entradas. Ó ultimo que fixo en teatro é: “Apaga o Candil” de Contraproducións Teatro, dirixido e escrito por Cándido Pazó. “O mel non caduca” de Ibuprofeno Teatro, dirixido por Sante Cortegoso, onde fai de todo e ademáis actúa en “Guerra de Identidade” de DeUve, que dirixíu. “Commedia, un xoguete para Goldoni” dirixido por Cándido Pazó para Contraproducións, onde fai de Brighella. Fai cine e sae na tele en “Cuñados” de Portocabo; “Padre Casares” e "Serramoura" da TVG, “Seis Hermanas” da TVE1... E conta contos, historias, monologuea, de Polonia a Cuba, de Inglaterra a Cádiz, dende o ano 99 e ata a fin dos tempos. Polo camiño fai obradoiros de teatro, radioteatro, podcasts, etc. Todo é contar cousas bonitas. (E si, gústanlle as abellas, de sempre son unhas máis da familia) Para máis cousas: https://avelinogonzalez.gal/

Este espectáculo forma parte do programa de animación á lectura e dinamización da Lingua Galega organizado pola Biblioteca Pública Municipal dependente da Concellería de Cultura do Concello, e conta coa axuda económica da Deputación Provincial de Pontevedra a través do circuito de apoio á programación de artes escénicas en galego nos concellos da provincia "+ESCÉNICAS 2026".

Para calquera información sobre a programación podedes contactar coa Biblioteca por teléfono chamando ao número 986 497 273 ou por correo electrónico a biblioteca@pazosdeborben.gal no noso horario habitual de apertura.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

Nadal con Contos en BiblioPazos

Festexa o Nadal coa nosa selección de contos e panxoliñas:

Fai Clic nas imaxes

           

           

   

Achégate a BiblioPazos para descubrir moitos máis.

 

"O CONTO DE BARRIGA VERDE" de Manuel María con FRAN REI de Culturactiva - Programa LER CONTA MOITO de 2025

Continuamos coas actividades do mes de Setembro e nesta ocasión presentamos o espectáculo de narración oral "O CONTO DE BARRIGA VERDE" de Manuel María que nos traerá FRAN REI de Culturactiva e que terá lugar o Venres 19 de Setembro a partir das 13:00 horas nas instalacións do CPI "Curros Enríquez" de Pazos e co que aproveitaremos para conmemorar a chegada do Equinoccio de Outono e inicio do curso escolar 2025/2026.

Fran Rei presenta un novo espectáculo unipersoal que mestura narración oral, humor e maxia: O conto de Barriga Verde, escrito por Avelino González a partir de tres obras de Manuel María (Barriga Verde, Os soños na gaiola e Aventuras e desventuras dunha espiña de toxo chamada Berenguela).

Os Contos de Barriga Verde pretende ser un achegamento á poesía, prosa e teatro do autor lucense a quen lle dedicaron o Día das Letras Galegas no ano 2016.

Un contacontos que mestura a narración coa maxia e os monicreques con Fran Rei en escena.

Nesta sinxela historia, Fiz, un mozo labrego galego, terá que enfrontarse ao Serrador e ao Demo polo namoramento da sempre belida Moza.

Coa axuda da maxia do seu padriño Barriga Verde, vello e neno demostrarán ao mesmo tempo que nada é máis forte que o amor verdadeiro.

"Aquí sigo: ledo, ufano, satisfeito de estar vivo. Mentras o tempo me gasta: paseo, leo e escribo...!"

(Manuel María, Os Soños na Gaiola, 1968)

Están convidados a participar nesta actividade os escolares de Infantil e 1º e 2º de Primaria do CPI "Curros Enríquez" de Pazos e Infantil da EEI "A Galeriña" de Nespereira.

Fran Rei é un nome fundamental do clown en Galicia. Cofundador, pallaso en activo e coordinador da compañía oficial do Festival Internacional de Clown de Galicia (Festiclown), Os Sete Magníficos Máis Un, ten participado con ela nun total de doce espectáculos teatrais desde o ano 2001. En paralelo, ten traballado noutras compañías de teatro galegas, como Bagunça Teatro, Produccións Desaqueloutradas, Acontrabutaca e Culturactiva SCG, e tamén ten experiencia no mundo televisivo. Xunto a Pedro Brandariz, formou as parellas cómicas O Gordo e o Calvo e Os ramistas, que participaron regularmente no programa Luar da TVG entre 2012 e 2016.

Na súa formación escénica destacan numerosos cursos de teatro, clown e bufón con algúns dos mellores mestres do panorama internacional, como Good Idea Company, Carlo Colombaioni, Leo Bassi, Eric de Bont, Iván Prado ou Antón Valén. Igualmente, tamén el exerce de profesor, xa que traballa como monitor de dramatización, dirixe varias aulas de formación teatral desde 2001 e desenvolve regularmente obradoiros de iniciación e perfeccionamento da técnica do clown.

Nos últimos anos está especializándose na dirección de espectáculos cómicos e de pequeño formato. Así, é director dos espectáculos Supergalácticos, de Código Morsa, Volta á maxia, de Dani García, Ritmo refugallo, de Trío Refugallo e Concerto singular (e plural) de Píscore. Ademais, é membro fundador da organización galega de cooperación internacional a través das artes Pallasos en Rebeldía e, con esta entidade, ten participado en diversas caravanas de pallasos por comunidades indíxenas de Chiapas (México).

Esta actividade atópase incluída no programa de dinamización da lectura LER CONTA MOITO que promove a Secretaría Xeral de Cultura da Consellería de Cultura, Lingua e Universidade da Xunta de Galicia a través da Rede de Bibliotecas Públicas de Galicia, en colaboración cos concellos e coas súas bibliotecas. 

EN BIBLIOPAZOS,  A BIBLIOTECA PÚBLICA MUNICIPAL DO CONCELLO DE PAZOS DE BORBÉN, SEGUIMOS TRABALLANDO POLA EDUCACIÓN E A CULTURA

"ECORALIA, A LAMBONA ECOLÓXICA" de PAKOLAS para conmemorar a chegada do Equinocio de Outono e o inicio do Curso Escolar.

Comezamos as actividades do mes de Setembro cun espectáculo musical dirixido ao público infanti que terá lugar nas instalacións do CPI "Curros Enríquez" de Pazos o próximo Venres 12 de setembro a partir das 13:00 horas e co que conmemoraremos a chegada do Equinocio de Outono e o inicio do Curso Escolar 2025/2026. Recibiremos a visita, outro ano máis, de PACO CERDEIRA “PAKOLAS" co seu espectáculo musical “ECORALIA, A LAMBONA ECOLÓXICA” baseado no seu último libro-disco editado polo CRAEGA en Decembro de 2024  e que está dispoñible na Biblioteca Pública Municipal de Pazos de Borbén e no resto das Bibliotecas de Galicia desde este ano 2025.

Pakolas presenta unha proposta musical-narrativa que conta e canta a historia da meiga Ecoralia, que nos ensinará a través das súas cancións e contos a importancia de consumir alimentos ecolóxicos, para coidar o medio ambiente, combater o cambio climático e garantir o benestar animal. Unha nova aventura didáctica e rockeira rebordante de imaxinación e aprendizaxe.

Así, a través das cancións e a narración, adentrámonos nas entrañas da carballeira máis extensa de toda Galicia, onde a vexetación é máis mesta e verde, vivía Ecoralia. Sempre vestía da cor do musgo e levaba unha trenza longa e roxa recollida cun estalote. Ecoralia era unha meiga moi nova e boa coñecedora de conxuros ancestrais aprendidos das súas avoas. Pero ela non era coma as demais.

De Ecoralia, moitas personaxes poderedes coñecer neste novo traballo musical, como o seu compañeiro Mistín, o lucecú, que vivía no medio das flores amarelas de xestas empregadas para os os seus conxuros. E, se Ecoralia era diferente ás demais meigas, Mistín era diferente aos demais lucecús, xa que tiña un semáforo no traseiro! Ramón o teixugo dispoñía do ultramarinos da vila. Sempre había alimentos coa etiqueta ECO de CRAEGA: froitas e legumes, leite, carne, ovos, mel e mesmo alimentos do mar. Os alimentos ecolóxicos sempre sentaban ben!. Tamén as tías Rosa e Mónica, dúas irmás xemelgas que coidaban das súas hortas coma ninguén. E por último Don Arsenio, que recollía unhas enormes mazás todo o ano! 

Como podía ser? Todas estas personaxes e historias poderás coñecer neste novo espectáculo rockeiro, e desvelar este misterio.

"Pakolas", rockeiro e guitarreiro, é o nome co que Paco Cerdeira se presenta ante o público infantil, eido no que o músico conta con longa traxectoria.  Neste concerto, Pakolas guiaranos coa súa forza interpretativa e o seu humor por todo un universo musical, a través da súa voz e a guitarra, nun espectáculo individual creado polo propio autor, onde a interacción e participación coas nenas e nenos, a animación, as súas caracterizacións e a súa música son o principal atractivo para o público.

Están convidados a participar nesta actividade os escolares de 3º a 6º de Primaria do CPI “Curros Enríquez” de Pazos.

Esta actividade atópase incluída no programa de dinamización da lectura LER CONTA MOITO que promove a Secretaría Xeral de Cultura da Consellería de Cultura, Lingua e Universidade da Xunta de Galicia a través da Rede de Bibliotecas Públicas de Galicia, en colaboración cos concellos e coas súas bibliotecas.

EN BIBLIOPAZOS,  A BIBLIOTECA PÚBLICA MUNICIPAL DO CONCELLO DE PAZOS DE BORBÉN, SEGUIMOS TRABALLANDO POLA EDUCACIÓN E A CULTURA