"A NENA E OS TRES OSOS" de BEA CAMPOS en Pazos de Borbén. Unha actividade de ATLÁNTICA MIÚDO da XIV Edición do FESTIVAL INTERNACIONAL DE NARRACIÓN ORAL "ATLÁNTICA"

Continuamos coas actividades do mes de xuño co espectáculo "A NENA E OS TRES OSOS" que nos trae a actriz, narradora oral e comunicadora BEA CAMPOS.

Con este espectáculo o Concello de Pazos de Borbén participa por oitavo ano no FESTIVAL INTERNACIONAL DE NARRACIÓN ORAL "ATLÁNTICA" que celebra a súa XIV Edición no 2026.

O espectáculo terá lugar o Venres 12 de Xuño, a partir das 13:00 horas no Auditorio do Concello de Pazos de Borbén e están convidados a asistir ao mesmo todo o alumnado de 1º a 4º de Primaria do CPI “Curros Enríquez” de Pazos; e todas aquelas veciñas e veciños que se inscriban previamente na Biblioteca chamando ao teléfono 986 497 273. A entrada é de balde ata completar o aforo do local.

"A NENA E OS TRES OSOS" é unha proposta escénica tenra, divertida e chea de imaxinación para público infantil e familiar. Un espectáculo con monicreques, música e obxectos que revisita un dos grandes clásicos da literatura infantil cunha posta en escena delicada e moi visual.

Nesta historia, as cousas máis sinxelas poden transformarse noutra cousa completamente distinta: unha maleta convértese nunha casa, un caldeiro nunha cadeira e unha manchea de calcetíns nunha entrañable familia de osos.

O oso grande, o oso mediano e o oso pequeno viven felices no bosque. Cada mañá repiten o mesmo ritual: preparan as papas do almorzo e saen pasear cantando e xogando mentres arrefrían. Mais un día, unha pequena visitante inesperada entra na súa casa e muda todo…

Con humor, cancións e moita creatividade, “A nena e os tres osos” convida ás crianzas a entrar nun universo onde o xogo e a fantasía transforman o cotián en aventura.

BEA CAMPOS leva media vida habitando escenarios, libros e historias. Actriz, narradora oral e comunicadora, é desas persoas capaces de converter unha palabra nun lugar ao que entrar e quedar un intre.

Licenciada en Arte Dramática pola ESAD de Galicia, comezou moi nova no mundo da narración oral e, dende entón, levou os seus contos por milleiros de funcións e festivais, tamén ao outro lado do Atlántico, participando en encontros de artes escénicas en Latinoamérica.

Forma parte de compañías fundamentais da escena galega como Migallas Teatro e Inventi Teatro, ademais de colaborar como actriz noutras propostas escénicas e audiovisuais. Mais se hai algo que define o seu traballo é a capacidade de crear unha conexión inmediata co público, sexa nun teatro, nunha biblioteca, nun patio escolar ou diante dunha cámara.

Formadora no ámbito da expresión dramática, da narración oral e da literatura infantil, Bea leva anos sementando historias tamén nas novas xeracións. Actualmente presenta Kalandraka TV, un espazo desde o que achega o mundo dos libros e da literatura infantil a pequenos e maiores cunha naturalidade luminosa e contaxiosa.

No FESTIVAL ATLÁNTICA, BEA CAMPOS é sempre garantía de emoción, humor, ritmo e desa calor especial que teñen as grandes contadoras cando fan sentir ao público que cada historia foi contada só para el.

Un ano máis formamos parte de Atlántica

Para calquera información sobre esta programación poden contactar coa Biblioteca chamando por teléfono chamando ao número 986497273 ou por correo electrónico a biblioteca@pazosdeborben.gal no noso horario habitual de apertura.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

"AS LETRAS DE BEGOÑA" Contacontos ilustrado e musicado do Colectivo XURELO para conmemorar o DÍA DAS LETRAS GALEGAS

Seguimos co programa de animación á lectura e dinamización da Lingua Galega da Biblioteca Pública Municipal do Concello de Pazos de Borbén "BiblioPazos" cunha nova actividade coa que queremos conmemorar o DÍA DAS LETRAS GALEGAS que este ano está dedicado á escritora, xornalista e activista feminista viguesa BEGOÑA CAAMAÑO.

E para conmemorar esta importante data e homenaxear a autora elixida pola Real Academia Galega este ano traemos a Pazos de Borbén ao Colectivo XURELO que nos traerán o contacontos ilustrado e musicado "AS LETRAS DE BEGOÑA" o próximo Xoves 28 de Maio a partir das 10:30 horas na Biblioteca do CPI "Curros Enríquez" de Pazos e ao que temos previsto que asista todo o alumnado de Infantil e 1º e 2º de Primaria do citado centro e o alumnado de Infantil da EEI "A Galeriña" de Nespereira.

Nesta proposta está orientada ao público infantil conmemoraremos o DÍA DAS LETRAS GALEGAS de 2026 e nela narrarase oralmente a historia da homenaxeada deste ano sempre dando pinceladas da obra e vida da mesma. Para finalizar faremos un obradoiro de debuxo no que realizaremos unha caricatura da autora homenaxeada este ano, unha das voces máis destacadas da literatura e do pensamento galego contemporáneo.

"É o memento non de cambiar as regras, senón de cambiar o xogo. é o momento de mudar o mundo, de introducir transformacións profundas e estruturais,pero tamén conceptuais; é o momento do feminismo, é dicir, da xustiza, da igualdade, da liberdade, da dignidade e tamén, porque non?, da felicidade".

Logo de máis de quince anos de traxectoria, a compañía Polo Correo do Vento tivo que cesar a súa actividade tras o falecemento dun dos seus integrantes. Este feito marcou o punto de partida do nacemento do Colectivo XURELO, que nace coa vontade de recoller e dar continuidade á herdanza de PCV, mantendo vivo o seu espírito e poñendo en valor a nosa cultura. Forman parte do Colectivo XURELO Kike Mauricio, Antón Ke, Marcelo Dobode e Alba Faro, ademáis da ilustradora Tania Solla.

O Concello adquiriu 100 exemplares do libro "BEGOÑA CAAMAÑO. Pequena biografía" de Polo Correo do Vento, ilustrado por Tania Solla e editado por Lela Edicións, e cada un dos asistentes a este evento será agasallado cun exemplar do mesmo; ademais tamén entregaranse varios exemplares á Bibliotecas do CPI "Curros Enríquez" de Pazos, da EEI "A Galeriña" de Nesperiera e da Asociación ASPAVI, ata acabar as existencias.

Para calquera información sobre a programación podedes contactar coa Biblioteca por teléfono chamando ao número 986 497 273 ou por correo electrónico a biblioteca@pazosdeborben.gal no noso horario habitual de apertura.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

"VIAXA COS LIBROS" un espectáculo de artes escénicas para conmemorar o DÍA DAS LETRAS GALEGAS

Continuamos coas actividades do Programa de Animación á Lectura e de Dinamización da Lingua Galega de 2026 da Biblioteca Pública Municipal do Concello de Pazos de Borbén - BiblioPazos neste mes de Maio para conmemorar o DÍA DAS LETRAS GALEGAS.

E para iso contaremos coa presencia de MANUEL SOLLA BARRAGÁNS de EXPRESIÓN PRODUCIÓNS que nos traerá ao Auditorio do Concello o seu espectáculo de artes escénicas "VIAXA COS LIBROS" o próximo Venres día 22 de Maiio a partir das 13:00 horas.

VIAXA COS LIBROS é un espectáculo de artes escénicas cheo de ilusión que combina, teatro, contacontos, monicreques, cancións e maxia.

Un espectáculo interactivo, dinámico e divertido

Esta actividade forma parte tamén do programa de dinamización da lectura "LER CONTA MOITO" que promove a Direción Xeral de Cultura da Consellería de Cultura, Lingua e Xuventude en colaboración cos concellos que teñan as súas bibliotecas integradas na Rede de Bibliotecas de Galicia.

Convidamos a asistir a este evento a todo o alumnado de Primaria do CPI "Curros Enríquez" de Pazos; aos usuarios da Asociación ASPAVI e a todas aquelas veciñas e veciños que se inscriban previamente na Biblioteca chamando ao teléfono 986 497 273.

Desde a Biblioteca Pública Municipal do Concello de Pazos de Borbén animamos a toda a veciñanza a conmemorar o DÍA DAS LETRAS GALEGAS e a participar en calquera das actividades que levamos e cabo e tamén nas que se realizan noutras bibliotecas, escolas e outras institucións da nosa comarca; animando aos mais novos a que lean polo menos 20 minutos cada día, e mellor si o fan na nosa lingua galega.

A entrada é de balde ata completar o aforo do local.

Para calquera información sobre a programación podedes contactar coa Biblioteca por teléfono chamando ao número 986 497 273 ou por correo electrónico a biblioteca@pazosdeborben.gal no noso horario habitual de apertura.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

LUPUS DESDE O PUPITRE, OBRADOIRO "LÚA FALA DO LUPUS" impartido pola Asociación Galega de Lupus (AGAL)

Continuamos co Programa de Animación á Lectura e de Dinamización do uso da Lingua Galega da Biblioteca Pública Municipal de Pazos de Borbén “BiblioPazos” neste mes de maio cun interesantísimo obradoiro de divulgación co que conmemoraremos o DÍA MUNDIAL DO LUPUS e co que queremos aportar o noso gran de area para dar visibilidade e concienciar á cidadanía sobre a esta enfermidade que afecta a moitas persoas en Galicia.

O obradoiro “LUPUS DESDE O PUPITRE - LÚA FALA DO LUPUS” terá lugar o próximo Mércores 20 de Maio de 2026 a partir das 10:20 horas na Biblioteca do CPI “Curros Enríquez” de Pazos e está dirixido ao alumnado de 6º de Educación Infantil e de 1º de Primaria deste centro educativo.

O día 10 de Maio de 2026 (Domingo) é a data de conmemoración do DÍA MUNDIAL DO LUPUS; una data establecida en 2004 durante o VII Congreso Internacional de Lupus Eritematoso Sistémico. Impulsada pola Federación Mundial do Lupus (World Lupus Federation), esta xornada ten como obxectivo sensibilizar á poboación sobre esta enfermidade autoinmunitaria crónica, promover a investigación e mellorar a atención médica para quen a padece.

Un obradoiro arredor do conto “LÚA FALA DO LUPUS” da colección Os Bolechas Guías editado por Bolanda Edicións e Marketing, pensado para achegar ao alumnado unha realidade pouco coñecida dun xeito próximo e adaptado á infancia. A través dun caderno de actividades, invítase á infancia a reflexionar sobre a diversidade, a empatía e o respecto ás persoas que conviven cunha enfermidade.

A proposta favorece a comprensión lectora e a educación en valores, ao tempo que promove o uso da lingua galega nunha xornada distendida e lúdica. Desde a Asociación Galega de Lupus (AGAL) quérese contribuír a crear aulas máis inclusivas e sensibles ás distintas realidades das persoas.

A Asociación galega de Lupus (AGAL) naceu en 1997 na provincia da Coruña. É unha entidade sen ánimo de lucro, declarada de utilidade pública, que desempeña un papel fundamental na mellora das condicións de vida das persoas con Lupus e a súa contorna en Galicia.

O Lupus é unha enfermidade sistémica, autoinmune, crónica e inflamatoria, cunha gran variedade de expresión clínica e caracterizada pola posible afectación de múltiples órganos e sistemas, para a cal non existe cura e que se estima que afecta a máis de 5.500 persoas en Galicia.

Esta actividade é totalmente gratuita e desde a Biblioteca Pública Municipal de Pazos de Borbén - BiblioPazos queremos agradecer á Asociación Galega de Lupus (AGAL) as facilidades que nos deu para poder desenrolar esta actividade e que a nosa rapazada coñeza esta enfermidade dun xeito lúdico e divertido.

Por certo, todas aquelas persoas que queiran colaborar coa Asociación Galega de Lupus (AGAL) poden facelo a través de Bizum ou Transferencia Bancaria facendo clic no seguinte enlace:

https://lupusgalicia.org/?page_id=3574

Indicar tamén que a Asociación Galega de Lupus (AGAL) está considerada de utilidade pública, e regulada pola Lei 49/2002, do 23 de decembro, do réxime fiscal das entidades sen fins lucrativos e dos incentivos fiscais ao mecenado.

Polo cal parte do importe da doazón que realices para axudar ao lupus poderase deducir na declaración da Renda nas seguintes cantidades (Exemplos):

• Opcional 1: Dedución do 40% se a achega é igual ou superior á dos dous exercicios anteriores.
• Opcional 2: Dedución do 35% da achega. Ademais, os primeiros 150 euros no exercicio xeran un dereito á dedución do 80% co límite de 120 euros.

Desde Biblioteca Pública Municipal de Pazos de Borbén - BiblioPazos facemos un chamamento para que os que poidades contribuír o fagades para poder axudar aos fins desta asociación.

Para saber máis sobre a Asociación Galega de Lupus (AGAL) accede ao seguinte enlace:

https://lupusgalicia.org/

Para calquera información sobre a programación podedes contactar coa Biblioteca por teléfono chamando ao número 986 497 273 ou por correo electrónico a biblioteca@pazosdeborben.gal no noso horario habitual de apertura.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

OBRADOIRO CREATIVO "CIENCIA SONORA" impartido polo artista sonoro MATEO MENA CALAVIA para conmemorar o DÍA MUNDIAL DO LIBRO E DO DEREITO DE AUTOR

Continuamos na Biblioteca Pública Municipal de Pazos de Borbén "BiblioPazos" coas actividades do Programa de Animación á Lectura e de Dinamización do uso da Lingua Galega de 2026 para continuar neste MES DO LIBRO conmemorando o DÍA MUNDIAL DO LIBRO E DOS DEREITOS DE AUTOR.

Para este día programamos unha actividade distinta das habituais de contacontos e similares e, nesta ocasión, vainos a acompañar o artista sonoro MATEO MENA CALAVIA que impartirá o Obradoiro Creativo "CIENCIA SONORA" ao alumnado de 5º e 6º de Primaria do CPI "Curros Enríquez" de Pazos o próximo Mércores 29 de Abril de 2026 a partir das 10:30 horas nas instalacións do CPI “Curros Enríquez” de Pazos en dúas sesións dunha duración de 1:30h cada unha delas.

O Obradoiro Creativo “CIENCIA SONORA” é un proxecto plenamente práctico orientado a traballar as aptitudes lóxico-matemática, interpersoal e musical do alumnado do 3º ciclo de Educación Primaria, e que combina conceptos científicos e sonoros nun ambiente de traballo baseado na experimentación.

A través da construción de diversos dispositivos musicais electrónicos, o alumnado irá adquirindo coñecementos prácticos sobre varios principios científicos (electromagnetismo, resistividade, frecuencia, vibración...) e a súa aplicación práctica, enfocándonos en áreas específicas como a creatividade, a educación ambiental, o método científico ou a aprendizaxe colaborativa.

Os diferentes proxectos nos que se divide o obradoiro lévanse a cabo con materiais cotiáns e de refugallo, favorecendo así que as experiencias poidan ser recreadas posteriormente con facilidade, tanto na aula coma noutros contextos.

Os contidos tratados no obradoiro son dun nivel básico de electricidade, química e son, podéndose adaptar en función da experiencia do grupo.

MATEO MENA CALAVIA (Santiago de Compostela, 1983). Artista sonoro. Cursou estudos de enxeñería electrónica na Universidade de Vigo. Paralelamente, entre 2005 e 2012 obtivo o título de Grao en Composición Musical no Conservatorio Superior de Música de Vigo, estudando ademais no Conservatorio «Santa Cecilia» de Roma durante 2008.

Especializado en música electroacústica, realizou cursos e masterclasses con compositores e artistas sonoros como Nicolas Collins («hardware hacking»), Juan Matos Capote («circuitbending»), Peter Bosch (deseño e creación de esculturas sonoras) ou Alberto Bernal, entre outros. Ao mesmo tempo impartiu charlas acerca da historia da música electrónica en España e Portugal, e talleres de creación de instrumentos electrónicos e outros dispositivos sonoros en museos e institutos de educación secundaria.

O seu catálogo de música académica inclúe obras para orquestra, grupos de cámara e mixtos, sendo estreadas en España, Italia, Portugal, Alemaña ou Suecia. Desde 2012 o seu traballo céntrase na arte sonora, vertente na que realizou obras interactivas, instalacións site specific e outros traballos en colaboración con diversos artistas. Como artista nesta disciplina pode observarse nos seus proxectos unha estreita relación entre arte e ciencia, buscando sempre vías de comunicación entre ambas as e tratando de aproximalas dalgún xeito ao público. 

Foi bolseiro polos programas «Sound-In para mozos creadores» (Madrid, 2012), as residencias «Sierra, centro de arte» (Huelva, 2013), «ARNA i Fågelriket» (Harlösa, Suecia, 2013), «Musibéria – Centro internacional de músicas e danças do mundo ibérico» (Serpa, Portugal, 2013-2014), «Cátedra Manuel de Falla» (Sevilla, 2014), e elixido como expositor na feira europea anual de inventores «Maker Faire 2014», (Roma) polo seu instrumento electrónico «The Hypercubes».

Para calquera información sobre a programación podedes contactar coa Biblioteca por teléfono chamando ao número de teléfono 986 497 273 ou por correo electrónico a biblioteca@pazosdeborben.gal no noso horario habitual de apertura.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

Espectáculo de narración oral "SERES MÁXICOS DO REINO DE GALICIA" de SOLE FELLOZA para celebrar o DÍA MUNDIAL DO LIBRO E DOS DEREITOS DE AUTOR

O pasado venres 17 de Abril iniciabamos as actividades do MES DO LIBRO co contacontos “AS AVENTURAS DE JOE & FONTE. Joe & Fonte múdanse a Mondariz Balneario” baseado no conto do mesmo nome escrito pola autora AURORA CORBACHO, ilustrado por CHIMAY e editado por Medulia editorial.

E imos continuar coas actividades do Programa de Animación á Lectura e de Dinamización da Lingua Galega de 2026 da Biblioteca Pública Municipal do Concello de Pazos de Borbén - BiblioPazos coas que queremos conmemorar o DÍA MUNDIAL DO LIBRO E DOS DEREITOS DE AUTOR, que se celebra en todo o mundo o día 23 de Abril de cada ano desde o 15 de novembro de 1995 en que tivo a sua orixe como unha maneira de render unha homenaxe a grandes escritores universais como Miguel de Cervantes, Garcilaso de la Vega, William Shakespeare, Vladimir Nabokov, Josep Pla e Manuel Mejías Vallejo, entre moitos outros; e foi a través da UNESCO que se decretou ese día co obxectivo de fomentar a lectura entre todos os públicos, a cultura e as letras no mundo, ademais de protexer a propiedade do dereito de autor, a iniciativa da Unión Internacional de Editores.

E é que ler axúdanos a coñecer culturas, a viaxar no tempo e a cultivar a nosa mente.

Para conmemorar esta importante data contamos coa actriz, contacontos, fotógrafa e xestora cultural SOLEDAD FELLOZA que nos traerá ao Auditorio do Concello o seu espectáculo de narración oral "SERES MÁXICOS DO REINO DE GALICIA" o próximo Venres día 24 de Abril a partir das 13:00 horas.

Houbo un tempo no que coñecer os seres máxicos era imprescindible para entender o mundo. Saber onde vivía o nubeiro, que monte habitaba un xigante ou en que fonte podía aparecer unha moura axudaba a orientarse no territorio, pero tamén na vida. Estes seres formaban parte dun saber compartido, ligado á terra, aos camiños e á memoria do país.

Hoxe moitos destes personaxes convertéronse en nomes alleos para a rapazada, figuras borrosas ou esquecidas. E cando esquecemos os seres que nos explicaban o mundo, empobrecemos o imaxinario colectivo e rompemos un fío esencial coa memoria do Reino de Galicia, coa súa xeografía simbólica e coa tradición oral que a sostivo durante séculos.

Este espectáculo de narración oral propón volver poñerlles voz, corpo e historia a esas criaturas. A partir do Mapa dos Seres Máxicos do Reino de Galicia, creado por Manuel Gago e ilustrado por Leandro Lamas, a palabra falada convértese nun mapa vivo: un espazo escénico onde pousar o dedo e abrir unha historia, onde cada lugar garda unha voz.

Trasnos, meigas, xacias, nubeiros, seres desaparecidos e outros vencellados a illas, montes, fontes ou camiños regresan á oralidade para ser contados de novo, reinventados e compartidos. Porque a tradición oral tamén é unha forma de ecoloxía cultural: o que non se conta, desaparece.

Seres Máxicos do Reino de Galicia é unha invitación a recuperar un imaxinario propio, rico e poderoso, e a facelo dialogar co presente, para que estas figuras deixen de ser reliquias do pasado e volvan acompañarnos no camiño cara ao futuro, como parte viva da identidade e da memoria do país.

Esta actividade forma parte tamén do programa de dinamización da lectura "LER CONTA MOITO" que promove a Direción Xeral de Cultura da Consellería de Cultura, Lingua e Xuventude en colaborción cos concellos que teñan as súas bibliotecas integradas na Rede de Bibliotecas de Galicia.

Convidamos a asistir a este evento ao alumnado de 3º a 6º de Primaria do CPI "Curros Enríquez" de Pazos; aos usuarios da Asociación ASPAVI e a todas aquelas veciñas e veciños que se inscriban previamente na Biblioteca chamando ao teléfono 986 497 273.

A entrada é de balde ata completar o aforo do local.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

Conmemoramos o DÍA INTERNACIONAL DO LIBRO INFANTIL E XUVENIL co contacontos "AS AVENTURAS DE JOE e FONTE. Joe e Fonte múdanse a Mondariz Balneario" aus nos trae a autora Aurora Corbacho e o ilustrador Chimay

Iniciamos as actividades do Programa de Animación á Lectura e de Dinamización do uso da Lingua Galega de 2026 da Biblioteca Pública Municipal de Pazos de Borbén “BiblioPazos” neste mes de abril cun interesantísimo contacontos baseado no libro “AS AVENTURAS DE JOE & FONTE. Joe & Fonte múdanse a Mondariz Balneario” de Aurora Corbacho, ilustrado por Chimay e editado por Medulia editorial.

O contacontos terá lugar o próximo Venres 17 de Abril de 2026 a partir das 13:00 horas na Biblioteca do CPI “Curros Enríquez” de Pazos e está dirixido ao alumnado de 1º e 2º de Primaria deste centro educativo.

Nesta actividade a autora AURORA CORBACHO e o ilustrador CHIMAY interactuarán coa cativada comentando o contido das páxinas, cantarán con eles un rap composto por Chimay e finalizarán cuns recortes dos deseños para que os asistentes o leven de lembranza para as súas casas.

“O contacontos é unha historia baseada nas vivencias reais da autora por mor da súa mudanza a Mondariz Balneario dende unha grande cidade xunto aos seus gatiños Joe e Fonte. Como consecuencia desta vivencia e de todo o que ven vivindo dende entón nese lugar marabilloso, xurdiu o texto e, grazas a Chimay, as preciosas imaxes que ilustran o libro. Neste pequeno conto os elementos que lle dan sentido son, co marco máxico da vila de Mondariz Balneario, a natureza que conforman os ríos, a vexetación e a fauna do val, o patrimonio arquitectónico e o coidado e respecto aos animais, co obxectivo final e de fondo de divulgar e tomar coñecemento da importancia do seu coidado e protección pola cativada, que será a que collerá o relevo das persoas adultas nun futuro”.           

AURORA CORBACHO (Vigo, 1971) é funcionaria de carreira na Administración Local, é Doutora en Dereito Público Pola Universidade de Vigo, e grao en Ciencias Xurídicas das Administracións Públicas con posgrao en Experta Universitaria en Administración Local pola UNED. Tamén ten o título de Xestora Administrativa. Conta con publicacións en revistas xurídicas sobre a temática da organización territorial. No ámbito literario, esta é a súa segunda incursión tras a participación cun poema na publicación de 2024 da Asociación sevillana “Cuadernos de Roldán”, dedicada a Mondariz Balneario. 

CHIMAY (Alfonso J. Rodríguez – Pontevedra, 1951) é licenciado en Belas Artes pola Universidade de Vigo. Traballou en diferentes estudios de arquitectura. E tamén na Xerencia de Urbanismo do Concello de Vigo ata a súa xubilación. A súa chegada ao mundo da ilustración foi casual. Fixo ilustracións para uns artigos dun amigo no Faro de Vigo que despois foron recompilados nun libro. 

Para calquera información sobre a programación podedes contactar coa Biblioteca por teléfono chamando ao número 986 497 273 ou por correo electrónico a biblioteca@pazosdeborben.gal no noso horario habitual de apertura.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA.

A GRAMOLA GOMINOLA visita Pazos de Borbén co seu espectáculo "ESPECIAL NADAL" - Programa "NADAL EN REDE" da Rede de Dinamización Lingüística

Rematamos a programación de actividades organizadas pola Biblioteca Pública Municipal do Concello de Pazos de Borbén-BiblioPazos neste ano 2025 cunha nova actividade en colaboración coa Rede de Dinamización Lingüística enmarcada no programa "NADAL EN REDE" da Secretaría Xeral da Lingua da Consellería de Cultura, Lingua e Xuventude da Xunta de Galicia. 

Esta nova actividade é "ESPECIAL NADAL" que nos traerá a banda "A GRAMOLA GOMINOLA" a Pazos de Borbén o próximo Sábado 27 de Decembro a partir das 19:00 horas no Auditorio do Concello de Pazos de Borbén, con entrada de balde ata completar o aforo.

"ESPECIAL NADAL" é un espectáculo do Nadal de "A GRAMOLA GOMINOLA" o grupo de música infantil máis famoso do momento que chega a Nadal en rede cargado de panxoliñas a ritmo de rock e ofrece un espectáculo onde soarán cancións do seu cuarto disco, "O Nadal coa avoa Fina": "Apalpador", "O rap metal do Nadal", "A Noiteboa sempre é boa coa miña avoa"..., temas para recuperar valores e tradicións e, sobre todo para bailar e para cantar en galego a todo pulmón.

Un Nadal para compartir coas persoas que queremos, para sentir, vivir, reciclar, plantar un piñeiro e, sobre de todo, un Nadal para cantar e bailar ben forte a ritmo de rock&roll, poñendo a todo o público en pe e cornos na man.

A GRAMOLA GOMINOLA é unha banda de auténtico Rock&Roll en galego para público cativo. Eles son Paco Cerdeira (Pakolas, Zenzar), Paula Romero (De Vacas, Coro Encaixe), Anxelo de Xermar (Festicultores Troupe) e Rodrigo Muñoz (Di elas, Lacón con Grelos). O grupo naceu no ano 2015 e dende entón deron centos de concertos poñendo ao público en pé cos cornos en man!

Premio Martin Códax da Música 2018 ao mellor grupo de música infantil. Teñen catro libros-CD no mercado publicados pola Editorial Galaxia.

Informamos que na Biblioteca temos todos os Libros-Cd publicados por "A Gramola Gominola" a disposición de quen solicite o seu préstamo para lelos e escoitar as cancións na súa casa ou onde queiran. Os títulos son "A Gramola Gominola", "Cancións para desafinar", "Bravas, o rexurdir da luz!" e "O Nadal coa avoa Fina".

ENTRADA DE BALDE ATA COMPLETAR O AFORO DO LOCAL

ESPERÁMOSVOS!!! NON FALTEDES!!!

Para calquera información sobre esta programación poden contactar coa Biblioteca chamando por teléfono chamando ao número 986497273 ou por correo electrónico a biblioteca@pazosdeborben.gal no noso horario habitual de apertura.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

Celebramos o NADAL co espectáculo "O CASTIÑEIRO DO APALPADOR" de "Fantoches Baj" - Programa +ESCÉNICAS da Deputación Provincial de Pontevedra

Rematamos coas actividades de animación á lectura e dinamización da Lingua Galega da Biblioteca Pública Municipal; financiadas polo Concello de Pazos de Borbén e pola Deputación Provincial de Pontevedra a través do programa +ÉSCÉNICAS de apoio á programación de artes escénicas en galego nos concellos da provincia de Pontevedra, co espectáculo "O CASTIÑEIRO DO APALPADOR" que nos traerá a Compañía FANTOCHES BAJ o Sábado 20 de Decembro a partir das 17:00 horas no Auditorio do Concello de Pazos de Borbén.

Neste espectáculo, creado a partir da tradición popular, un carboeiro que se alimentaba únicamente dos froitos do seu castiñeiro e que as xentes chaman O Apalpador, conta aos miúdos porque no Nadal reparte castañas aos nenos e nenas que non teñen nada nas súas barriguiñas.

O Apalpador é un carboeiro pobre cuxas únicas propiedades son un castiñeiro e un magosteiro. A súa grande preocupación é conseguir que os cativos non lle rouben as castañas. Ata que un día, se lle presenta na carboaría unha velliña aterecida de frío e de fame. El, compadecido, ofrécelle teito e castañas do seu magosto. A velliña que é unha meiga, ante a súa bondade, ofrece cumprirlle tres desexos e o apalpador, movido pola súa teima máis inmediata, pide que quen toque o seu castiñeiro quede pegado para sempre nel, que quen colla as castañas do chao o engula a terra e quen meta na man no seu magosteiro quede dentro encarcerado. Con estes tres desexos conseguirá sen embargo vencer a Morte. O Gobernador do mundo ao ver os efectos devastadores da desaparición da Morte obrigará ao Apalpador a ceibala. E o Apalpador ceibaraa pero antes asegurarase de que a el non lle toque xamais.

Convetido nun ser inmortal, liberado da necesidade de comer, e vendo que as castañas se lle estragan todos os anos, decide repartirllelas os nenos que pasan fame. Por iso, desde aquela, percorre o mundo apalpando as barrigas dos nenos e deixándolle unha presiña das castañas do seu castiñeiro a aqueles que a teñen valeira.

FANTOCHES BAJ é unha compañía creada inicialmente en Portugal por IGNACIO VILARIÑO no ano 2006. Desde aquela o seu campo de interese céntrase no teatro de monicreques entendidos dunha forma ampla. Desde a proposta máis tradicional dos bonecos de luva e variña do primeiro espectáculo "Tío Miseria" (2007), a unha progresiva apertura a outras formas máis contemporáneas do teatro de obxectos como no seu espectáculo "O Asombro" (2010) ou a utilización do kamishibai xaponés en "As Pombas de Carboeiro". Na actualidade son moitos xa os espectáculos no haber da compañía. Co seu espectáculo "Os Golfiños e o xigante" obtivo o premio Barriga verde de textos para teatro de monicreques na modalidade infantil.

A ENTRADA É DE BALDE ATA COMPLETAR O AFORO DO LOCAL

ESPERÁMOSVOS!!! NON FALTEDES!!!

Para calquera información sobre esta programación poden contactar coa Biblioteca chamando por teléfono chamando ao número 986497273 ou por correo electrónico a biblioteca@pazosdeborben.gal no noso horario habitual de apertura.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

"A HISTORIA DE RATA O PIRRATA" teatro familiar coa Compañía OLIVAS NEGRAS para conmemorar o DÍA MUNDIAL DO SORRISO

Na Biblioteca Pública Municipal do Concello de Pazos de Borbén "BiblioPazos" seguimos traballando pola educación, pola cultura e polo fomento da lectura entre a poboación do concello; e nesta ocasión, o facemos a través do teatro cun novo espectáculo para público infantil e familiar que forma parte do programa de animación á lectura e de dinamización da Lingua Galega de 2025 da Biblioteca promovido polo Concello.

O proximo Venres 3 de outubro de 2025 teremos con nós á Compañia de Teatro "OLIVAS NEGRAS" co seu espectáculo "A HISTORIA DE RATA O PIRRATA" na Casa Cultural de Pazos en dúas funcións cunha duración aproximada de 45 minutos cada unha delas. Aproveitaremos esta actividade para conmemorar o DÍA MUNDIAL DO SORRISO que se conmemora en todo o mundo o primeiro venres de outubro de cada ano desde o 2015.

A primeira función ás 13:00 horas vai destinada para o alumnado de 3º a 6º de Primaria do CPI "Curros Enríquez" de Pazos e os usuarios da Asociación ASPAVI e á función das 18:00 horas poderá asistir todo o público en xeral que queira con entrada libre ata completar o aforo do local.

O público será a tripulación que se embarque nunha emocionante e divertida aventura neste espectáculo de teatro infantil "A Historia de Rata o Pirrata".

Nesta enérxica representación, seguiranse os pasos de Nazario, un buscavidas coa mirada posta no tesouro, e Rata, un rapaz valente cun soño: ser un auténtico pirata dos mares.

Con risas aseguradas e momentos emocionantes, os protagonistas embarcaranse nunha misión para atopar o tesouro do temido pirata Bocachancla. Pero ao longo do camiño, descubrirán que o verdadeiro tesouro non se atopa en ouro e xoias, senón na forza da amizade e na aventura compartida.

Dirixido a nenos e nenas de todas as idades, "A Historia de Rata o Pirrata" é un espectáculo que cautivará tanto aos máis pequenos como aos adultos. Coa súa combinación de humor, emoción e valores positivos, é a elección perfecta para unha xornada de diversión.

ESPERÁMOSVOS!!! NON FALTEDES!!!

Para calquera información sobre esta programación poden contactar coa Biblioteca chamando por teléfono chamando ao número 986 497 273 ou por correo electrónico a biblioteca@pazosdeborben.gal no noso horario habitual de apertura.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

"O CONTO DE BARRIGA VERDE" de Manuel María con FRAN REI de Culturactiva - Programa LER CONTA MOITO de 2025

Continuamos coas actividades do mes de Setembro e nesta ocasión presentamos o espectáculo de narración oral "O CONTO DE BARRIGA VERDE" de Manuel María que nos traerá FRAN REI de Culturactiva e que terá lugar o Venres 19 de Setembro a partir das 13:00 horas nas instalacións do CPI "Curros Enríquez" de Pazos e co que aproveitaremos para conmemorar a chegada do Equinoccio de Outono e inicio do curso escolar 2025/2026.

Fran Rei presenta un novo espectáculo unipersoal que mestura narración oral, humor e maxia: O conto de Barriga Verde, escrito por Avelino González a partir de tres obras de Manuel María (Barriga Verde, Os soños na gaiola e Aventuras e desventuras dunha espiña de toxo chamada Berenguela).

Os Contos de Barriga Verde pretende ser un achegamento á poesía, prosa e teatro do autor lucense a quen lle dedicaron o Día das Letras Galegas no ano 2016.

Un contacontos que mestura a narración coa maxia e os monicreques con Fran Rei en escena.

Nesta sinxela historia, Fiz, un mozo labrego galego, terá que enfrontarse ao Serrador e ao Demo polo namoramento da sempre belida Moza.

Coa axuda da maxia do seu padriño Barriga Verde, vello e neno demostrarán ao mesmo tempo que nada é máis forte que o amor verdadeiro.

"Aquí sigo: ledo, ufano, satisfeito de estar vivo. Mentras o tempo me gasta: paseo, leo e escribo...!"

(Manuel María, Os Soños na Gaiola, 1968)

Están convidados a participar nesta actividade os escolares de Infantil e 1º e 2º de Primaria do CPI "Curros Enríquez" de Pazos e Infantil da EEI "A Galeriña" de Nespereira.

Fran Rei é un nome fundamental do clown en Galicia. Cofundador, pallaso en activo e coordinador da compañía oficial do Festival Internacional de Clown de Galicia (Festiclown), Os Sete Magníficos Máis Un, ten participado con ela nun total de doce espectáculos teatrais desde o ano 2001. En paralelo, ten traballado noutras compañías de teatro galegas, como Bagunça Teatro, Produccións Desaqueloutradas, Acontrabutaca e Culturactiva SCG, e tamén ten experiencia no mundo televisivo. Xunto a Pedro Brandariz, formou as parellas cómicas O Gordo e o Calvo e Os ramistas, que participaron regularmente no programa Luar da TVG entre 2012 e 2016.

Na súa formación escénica destacan numerosos cursos de teatro, clown e bufón con algúns dos mellores mestres do panorama internacional, como Good Idea Company, Carlo Colombaioni, Leo Bassi, Eric de Bont, Iván Prado ou Antón Valén. Igualmente, tamén el exerce de profesor, xa que traballa como monitor de dramatización, dirixe varias aulas de formación teatral desde 2001 e desenvolve regularmente obradoiros de iniciación e perfeccionamento da técnica do clown.

Nos últimos anos está especializándose na dirección de espectáculos cómicos e de pequeño formato. Así, é director dos espectáculos Supergalácticos, de Código Morsa, Volta á maxia, de Dani García, Ritmo refugallo, de Trío Refugallo e Concerto singular (e plural) de Píscore. Ademais, é membro fundador da organización galega de cooperación internacional a través das artes Pallasos en Rebeldía e, con esta entidade, ten participado en diversas caravanas de pallasos por comunidades indíxenas de Chiapas (México).

Esta actividade atópase incluída no programa de dinamización da lectura LER CONTA MOITO que promove a Secretaría Xeral de Cultura da Consellería de Cultura, Lingua e Universidade da Xunta de Galicia a través da Rede de Bibliotecas Públicas de Galicia, en colaboración cos concellos e coas súas bibliotecas. 

EN BIBLIOPAZOS,  A BIBLIOTECA PÚBLICA MUNICIPAL DO CONCELLO DE PAZOS DE BORBÉN, SEGUIMOS TRABALLANDO POLA EDUCACIÓN E A CULTURA