CONMEMORARACIÓN DO DÍA INTERNACIONAL DO LIBRO INFANTIL - "HISTORIAS DUN MUNDO GRANDE" CON FRAN AMEIXEIRAS DE "BANDULLO AZUL"

No Concello de Pazos de Borbén conmemoraremos outro ano máis o DÍA INTERNACIONAL DO LIBRO INFANTIL coa actividade que ten organizada a Biblioteca Pública Municipal "BIBLIOPAZOS" para o Mércores 2 de Abril a partir das 13:00 horas no Ximnasio do CPI "Curros Enríquez" de Pazos na que recibiremos a FRAN AMEIXEIRAS de "BANDULLO AZUL" que nos traerá o seu espectáculo "HISTORIAS DUN MUNDO GRANDE".

O obxectivo desta e outras activiaddes é a de seguir promocionando a educación e a cultura e animar á lectura a nenas/os, mozas7os e adultos de todas as idades.

Temos convidado a asistir a este evento ao alumnado de Infantil e 1º/2º de Primaria do CPI “Curros Enríquez” de Pazos e da EEI "A Galeriña" de Nespereira.

En “HISTORIAS DUN MUNDO GRANDE” a cadeliña Becki, desde a súa biblioteca onde pasa tanto tempo lendo e escribindo, cóntanos as historias que foi coñecendo nas súas viaxes polo mundo. Historias de colaboración e de solidariedade entre as persoas e con ela cantamos e bailamos para celebrar o respecto e a felicidade.

O mundo está cheo de historias diferentes, de culturas diferentes, de persoas diferentes. E a curiosidade e a empatía por esas outras culturas, esas outras persoas, axúdannos a mellorar o planeta que habitamos e a facer del un lugar máis pacífico e amoroso.

“BANDULLO AZUL” naceu en 2012 da man dos actores e cómicos Fran Ameixeiras e Fran Campos. Especializada no teatro familiar e en espectáculos educativos de animación á lectura, a compañía aposta por traballar en valores desde o clown xerando espectáculos didácticos, e cheos de comicidade e interacción cos máis pequenos.

Debido aos danos ocasionados polo temporal "Martinho" no edificio do Concello e non poder utilizar o Auditorio, esta actividade realizarase no Ximnasio do CPI "Curros Enríquez" de Pazos e, por problemas de aforo e seguridade, non podemos abrir a actividade a toda a veciñanza.

Este evento forma parte do programa de dinamización da lectura "LER CONTA MOITO" que promove a Dirección Xeral de Cultura da Consellería de Cultura, Lingua e Xuventude en colaboración cos concellos.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA.

DIA INTERNACIONAL DO LIBRO INFANTIL 2025

Jella Lepman fundadora do IBBY (INTERNATIONAL BOARD ON BOOKS FOR YOUNG PEOPLE), organización internacional integrada por unhas 80 seccións nacionais) foi a pioneira de moitas iniciativas para a promoción da lectura e da literatura infantil, e entre elas, a súa proposta en 1966 de celebrar un DIA INTERNACIONAL DO LIBRO INFANTIL e que fose o 2 de abril, data que se conmemora o nacemento do escritor danés Hans Christian Andersen.

Así, Desde 1967, o 2 de abril, o IBBY promove a celebración do DÍA INTERNACIONAL DO LIBRO INFANTIL co fin de promocionar os bos libros infantís e xuvenís e a lectura entre os máis novos.

Cada ano, unha sección nacional do IBBY ten a oportunidade de ser a patrocinadora internacional do Día do Libro Infantil e selecciona un escritor representativo e a un recoñecido ilustrador do seu país para que elaboren a mensaxe dirixida a todos os nenos do mundo e o cartel que se distribúe por todo o mundo, e promóvase a celebración nas bibliotecas, centros escolares, librerías etc.

A sección patrocinadora deste ano é Paises Baixos que difunde a mensaxe da escritora Rian Visser. O tema deste ano é “A liberdade da imaxinación”, e o lema é a última frase do poema Linguaxe visual: “Estas palabras que saíron da miña boca son para ti". O poema provén da colección ilustrada de poesía Alle wensen van de wereld (2021) de Rian Visser e a ilustradora Janneke Ipenburg.

Rian Visser (1966) é unha escritora e poeta holandesa de libros infantís. Escribe textos divertidos e emocionantes. Xunto coa ilustradora Janneke Ipenburg, creou as coleccións de poesía Alle wensen van de wereld (2021) e Het is een zachte dag vandaag (2024). En 2022, Rian Visser gañou un Zilveren Griffel e a Gouden Poëziemedaille (Medalla de Ouro de Poesía). Rian Visser é moi activa en temas educativos. Deseña leccións dixitais sobre escritura creativa e promoción da lectura que os mestres poden usar de forma gratuíta. Desde 2024 ata 2026, foi oficialmente nomeada Poeta Infantil dos Países Baixos.

Janneke Ipenburg (1979) é unha ilustradora holandesa de libros infantís. Realizou dúas coleccións de poesía con Rian Visser. En 2023 fixo o libro ilustrado "Voor altijd bij jou". Ademais do seu traballo como ilustradora, Janneke traballou en varias películas de animación e actualmente está a traballar como deseñadora de personaxes nunha gran animación stop-motion chinesa. En 2023, Janneke estivo na lista de finalistas dos World Illustration Awards.

CONCURSO INTERNACIONAL DE DEBUXO

IBBY Países Baixos lanzou un Concurso Internacional de Ilustración para animar aos nenos de todo o mundo para usar e expresar a súa imaxinación e creatividade mediante a creación de obras de arte inspiradas no tema "A liberdade da imaxinación" e o lema asociado: "Estas palabras que saíron da miña boca son para ti". - do poema 'Linguaxe visual' de Rian Visser.

Crea un debuxo, pintura ou calquera outra obra de arte baseada no poema e envíaa a IBBY Países Baixos.

Todas as participacións están no seu sitio web, e os gañadores recibirán un paquete de libros para a súa escola. Esta exposición virtual é a nosa forma de celebrar a liberdade da imaxinación.

Faga clic para saber como participar!

A continuación ofrecémosvos a tradución da mensaxe ao galego facilitada por GÁLIX, Asociación do Libro Infantil e Xuvenil:

Linguaxe visual

Podes debuxar algo

para as palabras,

para as cousas que digo?

Daquela, debuxa

un buraco no día

o frío,

o vento,

un nó na gorxa

ou a mala sorte,

debuxa unha tose,

un suspiro,

o aroma a pan fresco,

o tempo,

o instante,

o principio ou a fin

dun plan,

debuxa ese lugar onde algún día,

ese lugar onde nunca,

ese lugar onde despois

ocorrerá algo,

debuxa a dor dun empurrón,

o sabor do mar.

Gustaríame ver tantas

cousas

o amor, por exemplo,

máis tarde,

algún día e quizais.

Fai debuxos

para o meu poema,

pero con liberdade:

estas palabras

que saíron da miña boca

son para ti.

Texto: Rian Visser Tradución: Mercedes Pacheco