Luces, bicos e cores - POESÍA INFANTIL

Luces, bicos e cores

Concha Blanco
Ilustraciones de Gemma Aguasca
Col. Fardel dos soños.

Edicións Embora. Ferrol, 2011

Idade recomendada: + 6 anos 

Dez poemas iluminados por atractivas ilustracións presentan unha natureza amable e xoguetona como un convite a soñar. Como a viaxe do papaventos que agasalla coas súas fitas de cores ás nubes sen labios e soa con ollos para chorar. Porque pode haber tristura no escuro día vestido de gris cando os paxaros, tristes, non cantan e unha enorme nube negra deixa saír o sol, que chora bágoas de amor pola flor da que está namorado e non pode ver. Mesmo a gaita, cansa e triste, quedou sen fala. Pero a noite co seu manto bordado de estrelas é a princesa de negro que cobre as ventás dos cuartos dos nenos e colga nas lámpadas sonos e pesadelos, e a Lúa viste de branco cual maxestosa raíña. O vento soprón gusta de abrir as ventás das casas e castelos, destapar teitos ou arrancar árbores, pero non é malo: é xoguetón, traveso, e gástalle bromas ao mar, que se enfurece con ondas moi gordas, mentres o vento con cariño lle solta bicos de algodón. Como se bican dous delfíns dando saltos sobre a auga.

Entón os sonos son luces e pódese soñar un teatro feito polas flores. Ou imaxinar vinte historias de fadas ou de medo, de reis ou de fantasmas. O pasalo moi ben montando en bicicleta, sen necesidade de móbil, mp3 ou game boy. Así se encontra un a si mesmo e mirándose no espello sabe que os ollos e a cara son o espello invisible da alma.

28 páx.

22 x 22 cm.

Encadernación: Cartoné 

ISBN 978-84-92644-40-7