LINE supera os 150 millóns de usuarios en todo o mundo

Aínda que a aplicación de mensaxería instantánea de máis éxito no contorno móbil continúe a ser WhatsApp, o seu principal competidor, LINE, está a medrar dun xeito impresionante nos últimos meses, anunciando hoxe que vén de superar os 150 millóns de usuarios en todo o mundo, o que parece ser consecuencia directa da súa boa adopción en España e América latina, que contribúen así á súa xa boa presenza en boa parte de Asia.

Ao parecer, a chave do éxito de LINE nos últimos meses sería consecuencia directa dos seus anuncios televisivos, aínda que o feito de que WhatsApp deixase claro que non era un servizo de balde tamén tivo moito que ver na aceleración da adopción de LINE, que está a conseguir facer rendible o seu negocio por outras canles, como vendendo stickers ou ofrecendo xogos Free-to-Play aproveitando a súa inmensa masa de usuarios.

Comparar LINE con WhatsApp non parece doado, pois actualmente o único dato que temos de WhatsApp é que ten máis usuarios que Twitter (que ten uns 200 millóns de usuarios mensuais activos) e move máis de 20.000 millóns de mensaxes ao día. Aínda que en EE.UU. o dominio de WhatsApp parece indiscutible, no caso español estímase que actualmente hai uns 20 millóns de usuarios de WhatsApp e 11 millóns de usuarios de LINE, aínda que do que non temos datos nin estimacións e do uso real que fan os usuarios de cada plataforma, posto que non son ferramentas excluíntes.

Un dos anuncios televisivos de LINE que poden verse en España

xoves 2 de maio do 2013, por Marcus Fernández |

Fonte: Código Cero