Do A ao Z con... Rosalía - LECTURA INFANTIL

Do A ao Z con... Rosalía

Ana María Fernández
Ilustracións de Javi Montes
Col. Ler é Vivir. Serie Morada.

Ed. Everest Galicia. A Coruña, 2009

A partir de 10 anos

Conxunto de poemas que, seguindo unha orde alfabética, recolle palabras chave de Rosalía de Castro para facelas revivir en versos novos, con variedade rítmica e sinxela riqueza metafórica de grande efectividade lírica.

Así: O Aire miudiño e calmo; a Barca miúda, soíña e pequena; os Cantares do mar e dos campos; o Dengue para a festa da que se contaxian mesmo as gaivotas, saltando contentas á comba coa brisa; a Estrela que aluma o camiño escuro da noite; as Follas, musas dos paxariños; Galicia, ou a casa que se herda; a Horta cos seus froitos; o Muíño da casa vella que xira e fai memoria; Iria, onde resoa no río a voz dos poetas nos tempos do frío; o Laíño dos verdes loureiros e do verde xade; os Namorados desfollando a cómplice margarida; a celebración rítmica da festa das Meniñas; os solitarios Outeiros, testemuñas solitarias do penar de amores; o triste Pazo en ruínas asolagado polas negras sombras, no que aínda as andoriñas fan os niños; o Quinteiro, onde o sol asoma e os paxaros ensaian a súa melodía mentres o medo foxe; o Regato armado por bágoas pequeniñas como dediños de prata; o río Sar, que leva as angurias da xente e traduce o falar do lobo; a centenaria Torre, que chama a berros ás xentes que habitan eternos desterros; a comarca do Ullán, co seu val e o río que busca o lecer das praias e as ondas; o vizosos Vales de Bastabales que regan as chuvias con perlas de auga; a Xustiza que lles negaron a todos os que tiveron que marchar e nunca puideron volver; a celebración da froita primeira dos soutos, os Zonchos.

A edición, ilustrada coa presenza dunha natureza esplendorosa, remata cunhas pequenas notas sobre a relevante aparición das voces poetizadas na obra de Rosalía

60 p. - 19x12 cm.

ISBN     978-84-403-1112-2 

Fonte: BLIX

 FAITE SOCIO DA BIBLIOTECA E LEVAO PARA LER NA CASA