Volve o Xabarín. "Nun tempo en que todo o dirixido á rapazada pasa polas factorías das grandes marcas. Cando todo o que se pensa para nenas ten forma de princesa rosa e para nenos forma de superheroe. Agora que os libros, as películas, a roupa e mesmo os iogures están inzados cheos dos mesmos personaxes infantís co único obxectivo de vender, nace algo diferente". Así se presenta Oink! A revista do Xabarín Club, unha revista mensual pensada para os máis novos e que sairá á rúa o 26 de agosto. Será mensual e presentarase en Viñetas desde o Atlántico o día 10.
Na iniciativa colaboran Miguelanxo Prado, Kiko da Silva, Andrés Meixide, Miguel Porto, Fran Bueno, Marilar Aleixandre, Miguel Robledo, Jacobo Fernández, Kohell, Victor Rivas e Pinto & Chinto. Todos eles e elas alimentarán "unha revista divertida, dinámica e, aínda que non o noten, educativa". Destacan que "queremos lembrar o que moitas veces esquecemos: os nenos e nenas son capaces de pensar, imaxinar, idear e deseñar cousas incribles. Só fai falla tratalos coma persoas que son e darlles os recursos que precisan para sacar todo ese potencial". E cunha perspectiva galega: "Dende Galicia ollaremos para todo o planeta, veremos que acontece en lugares moi distantes, pero tamén pescudaremos a nosa terra. Queremos que a mirada local lles demostre que moi preto deles hai cousas incribles que paga a pena descubrir".
Dende a empresa Agalip, responsable da publicación, fan un chamamento á implicación dos pais e nais e de todos os fans do xabarín: "Queredes que se lles fale de xeito divertido aos máis novos e con respecto ás súas capacidades? Botades en falta aquelas tardes cando o Xabarín vos abriu os ollos a outras realidades posibles e queredes compartir esa sensación? Queredes ser os pais máis molóns da bisbarra ou os familiares máis queridos nas paparotas dos domingos?".
Ademais de banda deseñada haberá outros contidos: "Arte, historia, ciencia, deportes, actualidade… tratados dunha forma diferente e divertida". Para todo iso botan man do "revolucionario Xabarín", do que salientan que "o seu xeito particular de ver as cousas, a súa actitude crítica e o seu devezo por coñecer son aptitudes que teñen moito que lles achegar aos máis novos da casa, non credes?".
Fonte: praza.com
Ningún comentario:
Publicar un comentario
Grazas polo teu comentario e por compartir a túa experiencia.
A túa participación axúdanos a mellorar.