"ARREDOR DE OTERO" de SOLE FELLOZA, un espectáculo de narración oral para conmemorar 50 ANIVERSARIO DO PASAMENTO DE RAMÓN OTERO PEDRAYO e o DÍA DAS LETRAS GALEGAS

Continuamos coas actividades do Programa de Animación á Lectura e de Dinamización da Lingua Galega de 2026 da Biblioteca Pública Municipal do Concello de Pazos de Borbén - BiblioPazos cun novo espectáculo de narración oral con que queremos conmemorar o 50 ANIVERSARIO DO PASAMENTO DE RAMÓN OTERO PEDRAYO e o DÍA DAS LETRAS GALEGAS 2026.

RAMÓN OTERO PEDRAYO (Ourense, 5 de marzo de 1888- Ourense, 10 de abril de 1976) é unha das grandes figuras da literatura e a cultura galega. Foi un profesor, escritor, xornalista e político galego. Catedrático de Xeografía na Universidade de Santiago de Compostela e membro do grupo Nós e das Irmandades da Fala, participou na coordinación da sección de Xeografía do Seminario de Estudos Galegos. Foi deputado polo Partido Galeguista e membro da Real Academia Galega. A súa obra é unha das máis prolíficas da nosa literatura: cultivou a narrativa, o teatro, o ensaio e a poesía, achegando unha modernización de todos eses xéneros en lingua galega.

Para esta ocasión contamos outra vez coa actriz, contacontos, fotógrafa e xestora cultural SOLEDAD FELLOZA que nos traerá ao Auditorio do Concello o seu espectáculo de narración oral "ARREDOR DE OTERO" o próximo Luns día 25 de Abril a partir das 13:00 horas.

“ARREDOR DE OTERO” é unha sesión de narración oral que bebe da escrita de Ramón Otero Pedrayo, da súa ollada demorada sobre a terra e do seu compromiso cun país pensado e contado dende dentro.

Contos que percorren o ano vivido —vendima, castañeira, Santos, Nadal— e devolven á palabra o seu lugar na memoria colectiva.

“ARREDOR DE OTERO” propón un achegamento á obra de Ramón Otero Pedrayo desde a narración oral, seguindo o fío da súa escrita fonda e do seu pensamento atento ao país. Os contos acompañan o discorrer do ano vivido, cando a vendima madura o tempo, a castañeira xunta á xente, Santos chama á memoria e o Nadal abre o inverno á palabra compartida. Historias nas que a terra, as voces e o pensamento se recoñecen, e nas que Galicia aparece non como escenario, senón como conciencia, feita de lembranza, rito e fidelidade ao que somos.

Esta actividade forma parte tamén do programa de dinamización da lectura "LER CONTA MOITO" que promove a Direción Xeral de Cultura da Consellería de Cultura, Lingua e Xuventude en colaborción cos concellos que teñan as súas bibliotecas integradas na Rede de Bibliotecas de Galicia.

Convidamos a asistir a este evento ao alumnado de Educación Secundaria Obrigatoria do CPI "Curros Enríquez" de Pazos; os usuarios da Asociación ASPAVI e a todas aquelas veciñas e veciños que se inscriban previamente na Biblioteca chamando ao teléfono 986 497 273.

A entrada é de balde ata completar o aforo do local.

Para calquera información sobre a programación podedes contactar coa Biblioteca por teléfono chamando ao número 986 497 273 ou por correo electrónico a biblioteca@pazosdeborben.gal no noso horario habitual de apertura.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA

O DÍA DAS LETRAS GALEGAS 2026 homenaxea á escritora, xornalista e activista viguesa BEGOÑA CAAMAÑO

Hoxe día 17 de Maio conmemoramos un novo DÍA DAS LETRAS GALEGAS desde que o 20 de marzo de 1963 os tres membros da Real Academia Galega -Manuel Gómez Román, Xesús Ferro Couselo e Francisco Fernández del Riego- presentaran nesta institución unha proposta histórica: que se declarase ese día de cada ano "DIA DAS LETRAS GALEGAS" como data para "recolle-lo latexo material da actividade intelectual galega". Por iso cada ano, nesta data, Galicia honra as súas Letras e a súa Lingua.

No ano 1963 celebrábase o centenario da publicación do libro "CANTARES GALLEGOS" de Rosalía de Castro, pero ignorábase a data da súa publicación por iso propúxose o día 17 de maio, por ser nese día cando Rosalía de Castro lle dedicou o seu libro ao tamén poeta Fernán Caballero; e así foi como se instituíu como festa anual do Día das Letras Galegas o 17 de maio. Escolleuse esta data porque "CANTARES GALLEGOS" foi o primeiro libro galego que tivo unha significación universal.

Neste ano 2026 a Real Academia Galega acordou, no Pleno Ordinario celebrado o 25 de xuño de 2025, dedicarlle o Día das Letras Galegas 2026 a BEGOÑA CAAMAÑO a proposta dos membros da Academia Ana Romaní, Marilar Aleixandre, María López, Margarita Ledo, Chus Pato e Francisco Fernández.

A Real Academia Galega ao dedicarlle o Día das Letras Galegas réndelle un tributo debido e oportuno, que contribuirá á merecida difusión popular da súa exemplar traxectoria como periodista defensora da información veraz —en tempos en que a comunicación social está intoxicada pola divulgación de loias que espallan o odio, a intolerancia e a confusión— e da súa soberbia achega á literatura galega, pondo o foco na fundamental achega feminina ao seu pulo.

Para mais información sobre a homenaxeada e os actos que terán lugar arredor deste DÍA DAS LETRAS GALEGAS podedes acceder á páxina web da Real Academia Galega na seguinte imaxe:

E tamén nesta páxina web da RAG atopareces no apartado "RECURSOS" atoparedes un montón de enlaces a outras páximas web (Primavera das letras, Portal das Palabras, Seminario Galán, Radio Galega, etc.) con información e actividades para todas as idades para coñecer a fondo á autora homenaxeada neste Día Das Letras Galegas 2026.

EN BIBLIOPAZOS SEGUIMOS TRABALLANDO POLA EDUCACIÓN E A CULTURA