CONCURSO DÍA INTERNACIONAL DO LIBRO INFANTIL 2016 - "ADOPTA UN ANIMAL DE CONTO" - PARTICIPA!

CONCURSO

“ADOPTA UN ANIMAL DE CONTO” 

Con ocasión do DÍA INTERNACIONAL DO LIBRO INFANTIL, a Organización Española para o Libro Infantil e Xuvenil (OEPLI), xunto coas súas catro seccións: Asociación Galega do Libro Infantil e Xuvenil (GÁLIX), Consejo General del Libro Infantil y Juvenil, Consell Català del Llibre Infantil i Juvenil (ClijCAT) e Galtzagorri Elkartea, co patrocinio do Ministerio de Educación, Cultura e Deporte, convoca o concurso:

 

A Biblioteca Pública Municipal do Concello de Pazos de Borbén "BIBLIOPAZOS" súmase a esta iniciativa e convoca aos seus usuarios/as, lectores/as e veciños a participar:

• Dirixido a lectores que estean a cursar PRIMARIA ou o primeiro ciclo de SECUNDARIA. 
• Escoller un libro en galego xa lido polo/a participante, no que o animal (real ou fantástico) teña relevancia na historia.
• Facer un debuxo dese animal, tal e como o imaxina. Valoraráse a orixinalidade, así como que non se deben copiar posibles ilustracións!
• Cada orixinal deberá ter un formato de 10 x 10,5 cm. Por un lado o debuxo e polo outro un breve texto, manuscrito, explicando o motivo polo cal foi escollido ese animal de conto. Deberán de figurar tamén os datos do libro a partir do cal fixeron a escolla do "animal de conto": título de libro, autor e editorial.
• A Biblioteca seleccionará un máximo de tres traballos por curso que serán remitidos a GALIX.
• Para participar é preciso entregar o debuxo na Biblioteca antes do xoves, 31 de marzo, e cumprimentar un boletín de participación.

Para máis información podes dirixirte a BIBLIOPAZOS:

• Por correo electrónico: biblioteca@pazosdeborben.org
• Polo Facebook: https://www.facebook.com/bibliopazos
• Por Teléfono: chamando ao nº 986 497 273.

PODES DESCARGAR AS BASES COMPLETAS DO CONCURSO FACENDO CLIC AQUÍ.

VEN A BIBLIOPAZOS E PARTICIPA!

 

O ÚLTIMO DÍA DE TERRANOVA

O ÚLTIMO DÍA DE TERRANOVA
Autor: Manuel Rivas
Edicións Xerais de Galicia S.A., 2015
Colección: Xerais Narrativa 

Xénero: Narrativa galega 

A libraría Terranova é un lugar diferente no planeta Terra, habitada por libros e almas, un escenario de amores e resistencia, un refuxio de náufragos da vida, un santuario de animais, un lugar de memoria e emoción, onde de súpeto aparece no escaparate o letreiro da Liquidación total de existencias por peche inminente. 

Cando chega o ultimato e se pon en marcha o proceso de desafiuzamento, Vicenzo, o libreiro, que arrastra as secuelas dunha doenza na infancia («O meu corpo é un manifesto!»), revive a propia historia e a da libraría, mentres tenta facer fronte á especulación e ao que el chama o Imperio do Baleiro. 

Terranova é un lugar de emoción e memoria. Foi porto de desembarco de libros descoñecidos ou prohibidos, unha especie de Ítaca entre Europa e América, un territorio de liberdade secreta no franquismo, onde as «botellas ao mar» do exilio retornan, en xeito de libros, en maletas e baúis de emigrantes. E será tamén o lugar de acollida para unha personaxe engaiolante, Garúa, unha moza exiliada arxentina, cuxa chegada transformará a vida de Terranova en tempos da chamada Transición, aínda perigosos e de gran incerteza histórica. Galicia, Bos Aires, Madrid, París, Lisboa..., xunto ao Pulmón de Aceiro, a Cámara Estenopeica, a Terra Escondida, a Memoria Profunda, o Faro e a Liña do Horizonte, son territorios e espazos reais que tamén pertencen á xeografía íntima da libraría Terranova. 

O último día de Terranova é unha novela de enxeño multiforme onde conflúen os xéneros literarios entrelazándose a serie negra, o humor da poética surrealista mesturado co da oralidade popular, e un realismo tan a rentes do chan como transcendente. 

A libraría Terranova converterase para quen entre nela nun lugar inesquecíbel. 

ISBN: 978-84-9914-941-7 

Nº de páginas: 256 

Encuadernación: Tapa blanda