Hoxe comenza no Pazo da Cultura de Pontevedra o
XVII Salón do Libro: "Canta bichería!"
Os animais serán os protagonistas deste 17º Salón do Libro: domésticos, salvaxes, polares, nocturnos, acuáticos. Formigas, osos, cans e paxaros. De todas as partes do mundo, dos ecosistemas coñecidos e por coñecer. Reais, fantásticos!!
Todos eles teñen cabida no Salón, que terá lugar no Pazo da Cultura entre o 1 e o 23 de abril de 2016, e cambia, despois de varios anos, o seu mes de celebración para adaptarse ao calendario escolar.
Os seus organizadores aseguran que o salón manterá a creatividade e imaxinación nesta edición, co obxectivo de seguir fomentando a lectura en galego.
O XVII Salón do Libro Infantil e Xuvenil contará cun programa amplo e variado co que cada ano intenta sorprender, compracer, divertir e formar a un público cada vez máis esixente.
Así que xa sabedes os "bichos" invaden estes días o Pazo da Cultura de Pontevedra. Pero tranquilos, non se trata dun problema de hixiene senón dos protagonistas desta nova edición do Salón do Libro Infantil e Xuvenil de Pontevedra.
Podedes consultar o Programa diario de actividades facendo clic na seguinte imaxe:
Tamén podes descargalo en formato PDF para imprimilo, facendo clic AQUÍ.
Desde BIBLIOPAZOS aproveitamos a ocasión para convidar a todos os veciños e veciñas a participar nas actividades deste importantísimo evento adicado á Literatura Infantil e Xuvenil.
