Seguiremos conmemorando o DÍA MUNDIAL DO LIBRO E DOS DEREITOS DE
AUTOR coa terceira actividade deste mes de abril que forma parte do noso programa de animación á lectura "ENCONTRO CON AUTORES" e que terá
lugar o próximo
XOVES 22 DE ABRIL ÁS 10:00 HORAS
NO
AUDITORIO DO CONCELLO
Trátese da conferencia “A INCRIBLE HISTORIA DO GALEGO CRISTOVO COLÓN. DE POIO
A BAIONA” que será impartida polo escritor RODRIGO COSTOYA SANTOS autor da novela
histórica “PORTOSANTO. O enigma de Colón” na que se basea esta charla.
“PORTOSANTO”, editada en galego -idioma orixinal do texto- no ano
2017 pola editorial Toxosoutos; e en castelán coa editorial Caligrama no ano
2019, é a primeira parte da triloxía “De
Luz e de tebras”, tres novelas (cada unha coa súa temática, pero cun núcleo
común no que atinxe á época, feitos históricos e personaxes) que abordan dende
diferentes perspectivas a eterna loita que libra o ser humano contra si mesmo.
A luz da sabedoría, a razón e a tolerancia contra a escuridade que representan
a ignorancia, o fanatismo e o dogmatismo.
A publicación desta novela ambientada na Idade Media que aborda a loita do
ser humano contra a escuridade ao longo da historia, relanzou a teoría que
avala que “CRISTÓBAL COLÓN” naceu en realidade en Galicia.
Aos primeiros
datos achegados por CELSO GARCÍA DE LA RIEGA a principios do século XX, e aos
descubrimentos de ALFONSO PHILIPPOT ABELEDO a partir dos anos 70 dese mesmo
século, RODRIGO COSTOYA recrea na novela a
historia dese neno bastardo que chega a ocupar un lugar preeminente na Historia
universal.
E é que desde PHILIPPOT, os indicios que demostran
que a identidade de COLÓN é en
realidade un invento do propio descubridor para ocultar as súas auténticas orixes comezan a ser demasiado convincentes como para ser ignorados. Así, o conxunto
de probas que achega o investigador (e desde entón, novas achegas a cargo de
moitos outros) deixa poucas dúbidas acerca da coincidencia entre o perfil do almirante e o nobre galego do século XV
PEDRO ÁLVAREZ DE SOUTOMAIOR, máis coñecido como “PEDRO MADRUGA”. A novela
de RODRIGO COSTOYA SANTOS eríxese, na
actualidade, como o principal elemento de difusión da teoría do Colón galego.
RODRIGO COSTOYA ten publicada coa editorial Pamiés a segunda novela da triloxía, “EL
CUSTODIO DE LOS LIBROS”, gañadora do IX Certame de Novela Histórica da
Cidade de Úbeda (Jaén) en 2020 e fora tamén finalista do Premio de Novela Torrente Ballester en 2018
convocado pola Deputación da Coruña. Xa vai pola súa 3ª edición.
Contaremos coa asistencia dos alumnos de 3º e 4º de ESO do CPI “Curros Enríquez” de Pazos e aquelas
outras persoas interesadas que queiran participar nesta actividade e coñecer un
pouco máis polo miúdo a historia “do pequeno bastardo que cambiou o mundo
para sempre”, poden
inscribirse –ata completar o aforo- chamando ao teléfono da Biblioteca nº 986
497 273.
ANÍMÁDEVOS!!!
PARTICIPA
NAS ACTIVIDADES DE BIBLIOPAZOS!!!
ESPERÁMOSVOS!!!
