O vídeo-currículo de Luis Castro

Recoñecido cun prestixioso galardón nos Estados Unidos

venres 14 de decembro do 2012, por Fernando Sarasqueta

O vídeo en liña do mozo Luis Castro, do que falamos a comezos de ano para dar conta da súa boa acollida como método axeitado para normalizar unha serie de cousas (o uso das novas canles para a procura de actividade laboral, a creatividade posta en xogo nese proceso, a concorrencia de persoas con diversidades funcionais ou motrices no mercado laboral en total igualdade de condicións, etc), vén de obter un importante recoñecemento polos positivos valores que achega e polo atinado do seu compoñente viral. O vídeo en cuestión, que acadou unhas 300.000 descargas en YouTube, foi premiado en Estados Unidos co galardón John Caples 2012 (edición 34), a categoría de Viral Video Marketing.

Como lembraremos, o reclamo en liña de Luis Castro forma parte dunha campaña de FSC Insire e a Fundación ONCE, co-financiada co Fondo Social Europeo, para promover a sensibilización sobre a necesidade de non facer discriminacións, nin dende o empresariado nin dende a sociedade en xeral, á hora de concibir o mercado laboral.

Os premios John Caples foron creados en 1978 por Andi Emerson, un pioneiro da mercadotecnia directa que lles deu o nome do senlleiro redactor John Caples. Os galardóns diríxense a distinguir os mellores traballos do mundo en mercadotecnia directa e interactiva.

Con sede en cincuenta países estes galardóns están financiados por axencias, clientes e provedores e son xestionados por voluntarios da industria publicitaria.

O vídeo-currículo de Luis Castro foi igualmente galardoado co premio ouro Eficacia 2012, recoñecemento especial á concienciación, prata FIAP 2012, na categoría de Prensa e Relacións Públicas e finalista na categoría Interactivos de FIAP 2012 na de Ideas, Comunicación institucional e Patrocinios do Club Creativos 2012. Tamén recibiu o premio Laus 2012 na categoría Dixital e foi finalista dos premios O Sol 2012.

Fonte: Código cero