Materiais Didácticos para o Entroido

Achégamosvos aquí Materiais Didácticos para traballar sobre o Entroido publicados na páxina web da Secretaría Xeral de Política Linguística da Xunta de Galicia.

Autor da imaxe: Alfredo Miguel Romero

O Entroido en Galicia: o EDLG do CEIP Ponte dos Brozos comparte con nós este traballo centrado na celebración do Entroido. Explícase a etimoloxía da palabra, a orixe da festa e repásanse os costumes e os pratos tradicionais propios destas datas. Tamén aparecen actividades e ligazóns a outros recursos que servirán para reforzar os coñecementos adquiridos.

O Entroido en Galiza: dende o CEIP Nosa Señora de Xuvencos de Boborás, chéganos unha exhaustiva mostra de distintos xeitos de celebrar o Entroido. Céntrase sobre todo na provincia de Ourense, aínda que inclúe a tradición pontevedresa dos Xenerais do Ulla. 

Coplas de Entroido de 3º de EP: os alumnos de 3º do CEIP A Ponte  de Lugo son quen de personificar o verdadeiro sentido crítico e humorístico do Entroido a través das súas coplas. Deixádevos posuír polo espírito de don Carnal e imitádeos. Ollo á rima!

Entroido de Cobres: con intención de dar a coñecer e revitalizar o Entroido en Galicia, o EDLG do IES Frei Martín Sarmiento ofrécenos un interesante documento sobre o Entroido de Cobres, propio de Vilaboa. Achegádevos a coñecer o mordomo, as madamas ou os galáns!

Entroido (caderno con actividades e información): dende o CEP Plurilingüe Igrexa Valadares de Vigo, chéganos un interesante caderno sobre o Entroido. Aquí poderedes atopar información e actividades sobre as orixes, diferentes manifestacións ou gastronomía desta festividade.

Vocabulario básico de Entroido do CEIP de Tarrío: nestes vocabularios atoparemos unha ampla descrición dos personaxes máis representativos do Entroido galego, desde as pantallas e os peliqueiros ás madamas e os xenerais.Tamén se detallan, por orde cronolóxica, cales son os días máis sinalados, os pratos máis típicos e as denominacións que reciben en distintas zonas de Galicia.