Os alumnos de 1º da ESO e 6º de PRIMARIA do Centro Público Integrado “Curros Enríquez” de Pazos liberaron 95 libros nos obradoiros de “Bookcrossing” realizados os días 28 e 30 de marzo na Aula Informática da Biblioteca Pública Municipal do Concello de Pazos de Borbén con motivo da celebración do “Día Internacional do Libro Infantil e Xuvenil”.
Despois de ter rexistrados na páxina web http://www.bookcrossing.com/ todos os libros, estes foron etiquetados e distribuídos polas zonas de cruce por todo o concello.
Finalmente, nas zonas de cruce, puxéronse a disposición dos usuarios 23 libros no Centro Público Integrado “Curros Enríquez”, 12 na Biblioteca Pública Municipal, e 10 na Casa do Concello, na parroquia de Pazos.
Na parroquia de Amoedo entregáronse 11 exemplares na Casa do Pensionista; no Centro Recreativo Cultural da parroquia de Moscoso foron liberados 18 libros; e na Casa da Cultura da parroquia de Nespereira distribuíronse 21 libros.
Dende o Concello, a Biblioteca Pública Municipal, o CPI de Pazos e todas as asociacións participantes anímase aos veciños e veciñas a participar desta interesante actividade de animación á lectura durante todo o mes de abril no que tamén se conmemorará o próximo día 23 o “Día Internacional do Libro”.
Na Biblioteca Pública Municipal disponse de etiquetas, que serán entregadas gratuitamente a todos aqueles que o soliciten e veñan con algún libro rexistrado na web http://www.bookcrossing.com/ e co seu código correspondente.
Con esta actividade o Concello de Pazos convírtese no municipio da provincia de Pontevedra onde mais exemplares foron liberados por esta modalidade de Bookcrossing, superando a concellos como os de Vilagarcía de Arousa, Pontevedra, Poio, Marín e Vigo.
Ademais a nivel de toda España este número de exemplares soamente son superados nas provincias de Barcelona, Illas Baleares, Illas Canarias, Madrid, Ourense, Sevilla e Zaragoza.